လွန်းဆက်နိုးမြတ်၏ “လာပါပြီ ဗမာပြည်လူမှုလိင်တစ်ပုဒ်”ကို ချဉ်းကပ်ခြင်း - (တည်တံ့)

မှတ်မှတ်ရရ ကဗျာဝေဖန်ရေးမိတ်ဆက်နဲ့စတင်ရင်းနှီးပြီးဒီစာပေအမျိုးအစားကို နှစ်လိုသဘောတွေ့တဲ့ခံစားမှုမျိုး ရခဲ့တာ (ဆရာ)အောင်ခင်မြင့်ကြောင့်ပဲ။ဆယ်တန်းအောင်ပြီးစအချိန် ဘာရည်ရွယ်ချက်မှတိတိပပမပါဘဲ စာပေအမျိုးအစားစုံအောင် လက်လှမ်းမီသမျှရှာဖွေမြည်းစမ်းတဲ့ကာလမှာ သူ့ရဲ့ကဗျာလေ့လာချက်ဆောင်းပါးတွေကို နှစ်နှစ်ခြိုက်ခြိုက်စွဲဖတ်ခဲ့ဖူးတယ်။ နောက်ပိုင်းမှာ ပိုပြီးကျယ်ပြန့်အောင် ချဲ့ထွင်ရှာဖွေလာဖြစ်ခဲ့တာကဇော်ဇော်အောင်၊ မင်းခက်ရဲ၊ သူရနီ စသဖြင့် .. ။ ရှာရင်းဖတ်ရင်းပဲ ဝေဖန်ရေးစာပေအမျိုးအစားဟာအရေအတွက်အားဖြင့်ရော အရည်အသွေးအားဖြင့်ပါ ကျဲပါးတာကိုလည်း သတိပြုမိတယ်။ ဆောင်းပါးတစ်ပုဒ်ချင်းအနေနဲ့သာအတွေ့ရများပြီး တစ်စုတစ်စည်းထဲ တွေ့ရလေ့မရှိတာလည်း ဖြစ်ကောင်းဖြစ်မယ်။ ဒါမှမဟုတ် စိုင်းဝင်းမြင့်ကဗျာပေါင်းချုပ်ထဲကမောင်သာနိုး၊ အောင်ခင်မြင့်၊ မိုးဝေးနဲ့ မောင်ယုပိုင်ရဲ့လက်ရာကောင်းတွေလို အမှာစာကဏ္ဍထဲမှာပေါ်လာတတ်လာလည်း ဖြစ်ကောင်းဖြစ်မယ်။ ဘာပဲဖြစ်ဖြစ် အခုနောက်ပိုင်းမှာ အွန်လိုင်းကဗျာလောကပိုကျယ်ပြန့်လာတာနဲ့အမျှ လိုင်းပေါ်မှာဆိုရင်လည်း ကဗျာရေးသူတွေများလာသလို တစ်ဖက်က ကဗျာဝေဖန်ရေးဘက်မှာမောင်ချာလီ၊ မောင်တီးတို့လို ကဗျာဝေဖန်ရေးသမားတွေရှိလာပြီး သူ့တို့လက်ရာတွေကို ကဗျာဆရာတွေနဲ့ကဗျာပရိသတ်တွေ လေးစားအသိအမှတ်ပြုလာရပြီ။
အရင်ကတော့ ကဗျာနဲ့ ကဗျာလေ့လာချဉ်းကပ်တဲ့ ဝေဖန်ရေးဆောင်းပါးပုံစံကိုသဘောကျနှစ်သက်ပြီး စွဲမြဲဖတ်ရှုတာကလွဲလို့ ကျွန်တော်နဲ့မသက်ဆိုင်တဲ့အရာလို့ပဲ ခံယူထားခဲ့တာ။ကျွန်တော်ဟာ ကဗျာဆရာမဟုတ်၊ ဝေဖန်ရေးသမားလည်း မဟုတ်တဲ့အတွက် ကျွန်တော့်တာဝန်က ဖတ်ရှုရုံသက်သက်ပဲ။ပရင့်မီဒီယာပေါ်မှာဖြစ်စေ အွန်လိုင်းမှာဖြစ်စေ ကဗျာဆရာတွေဟာ ကဗျာရေးသားခြင်းအမှု ဆက်လက်ပြုလုပ်နေကြမှာဖြစ်သလို ဝေဖန်ရေးသမားတွေဘက်ကလည်း သူတို့တာဝန်အတိုင်း လေ့လာချက်ဆောင်းပါးတွေ ဆက်လက်ရေးသားဖို့ကြိုးစားနေမှာပါ။စာဖတ်သူတစ်ဦးအနေနဲ့ ကျွန်တော့်တာဝန်က ဒါတွေကို လက်လှမ်းမီသလောက် ဖတ်ရှုဖို့သက်သက်ပဲ။

သို့သော် လွန်းဆက်နိုးမြတ်ရဲ့“လာပါပြီ ဗမာပြည် လူမှုလိင်တစ်ပုဒ်” ကဗျာ/ကဗျာအရေးအသားကို ဖတ်ပြီးချိန်မှာတော့ ပထမဆုံးအကြိမ်အဖြစ်ဒီကဗျာရဲ့အတွင်းသားနဲ့ အခြားကွယ်မြှုပ်ထားတဲ့အစိတ်အပိုင်းတွေအထိ ဆက်လက်တူးဆွကြည့်လိုစိတ်ပေါ်လာတယ်။ ကဗျာဟာ ဖတ်သူနေရာကကျွန်တော့်ကို ထင်မှတ်မထားတဲ့ ရှော့ခ်တစ်ခုနဲ့ရိုက်ခတ်လိုက်တယ်။ကျွန်တော်ဟာ ဖတ်ရှု၊ အနက်ပြန်၊ ဆွဲဆန့်တွေးတော၊ ပြီးတော့ နှစ်သက်သဘောကျ/မကျ ဆုံးဖြတ်စတဲ့ လုပ်ရိုးလုပ်စဉ်အစီအစဉ်အတိုင်း ဒီကဗျာကို ချဉ်းကပ်ရုံနဲ့ မလုံလောက်တော့ဘူး။ ကဗျာနဲ့ပတ်သက်ပြီးပြောစရာရှိလာတယ်၊ ပြောချင်တာတွေရှိလာတယ်လို့ ခံစားရတယ်။ ဒီအတွက် ကဗျာနဲ့စပ်လျဉ်းပြီးတစ်စုံတရာထုတ်ဖော်ရေးသားရတော့မယ်။ ကိုယ့်အတွေးအမြင်နဲ့ ချဉ်းကပ်ပုံကို ထည့်ဝင်ပြရတော့မယ်။နောက်ပြီး လှိုက်ခနဲပြုတ်ကျသွားခဲ့တဲ့ ကဗျာတွင်းနက်ထဲမှာ ဘာတွေကိုများဖမ်းဆုပ်ရယူနိုင်မလဲဆိုတာပင်လယ်ဓားပြတစ်ယောက်ရဲ့လောဘမျိုးနဲ့ ရှာဖွေရတော့မယ်။
…………………………………………………………………………………………………………………......

တစ်ခါတုန်းက အသိအကျွမ်းကဗျာဆရာတစ်ယောက်ကသူ့ကဗျာတစ်ပိုဒ်ကို ဘယ်လိုအနက်ပြန်သလဲ ဝေဖန်ပေးပါလို့ ပြောတယ်။ ကျွန်တော် ပြုံးပြီးငြင်းပယ်ခဲ့ဖူးတယ်။ ကျွန်တော့်အတွက်ကတော့ ကဗျာတစ်ပုဒ် စတင်သန္ဓေတည်ချိန်မှာ ကဗျာဟာ ရေးသူနဲ့သက်ဆိုင်တယ်။
ကဗျာသားလောင်းအဆင့်မှာလည်းရေးသူနဲ့သက်ဆိုင်တယ်။ ပီပီပြင်ပြင်ကဗျာတစ်ပုဒ်အဖြစ် လူလားမြောက်ပြီး အများဆီချပြလိုက်တဲ့အခါမှာတော့ကဗျာဟာ ဖတ်သူနဲ့သာ ပိုမိုသက်ဆိုင်သွားပြီ။ ကဗျာကိုအခြေပြုပြီး ရေးသူနဲ့ဖတ်သူအကြား ဆက်နွယ်မှုတစ်စုံတရာကျန်ရှိဦးမယ်လို့ပြောရင်ဒါကို ကျွန်တော်မယုံကြည်ဘူး (ကျွန်တော်မယုံကြည်ဘူးလို့ ဆိုတဲ့အတွက် ယုံကြည်သူများလည်းလွတ်လပ်စွာယုံကြည်နိုင်တာဖြစ်တယ်)။ ရေးသူက ကဗျာထဲမှာ သူဘာကိုဆိုလိုခဲ့တာပါလို့ ထုတ်ဖော်ရှင်းပြနေမှာမဟုတ်သလိုရှင်းပြဖို့လည်းမလိုအပ်ဘူး၊ ဖတ်သူဘက်ကလည်း သူ့အနက်ပြန်မှုဟာ ရေးသူဆိုလိုတာနဲ့ ကိုက်ညီမညီတိုက်ဆိုင်အတည်ပြုစရာမလိုဘူးလို့ပဲ မြင်တယ်။ ကဗျာဖတ်သူတစ်ယောက်အနေနဲ့ မူရင်းကဗျာဆရာပေးလိုတဲ့မတ်ဆေ့ခ်ျတစ်ခုခုကို ရှာဖွေတူးဆွခြင်းဖြစ်စဉ်မှာ ကျွန်တော်တို့ဟာ ကဗျာရည်ရွယ်ရင်းကိုအတိအကျဖမ်းဆုပ်နိုင်တာရှိကောင်းရှိမယ်၊ အခြားတစ်ဖက်မှာ မိမိခံစားတွေးတောမှုအမြင်နဲ့ကွဲပြားခြားနားစွာ အနက်ကောက်ယူတာမျိုးလည်း ဖြစ်နိုင်တယ်။ “ကိုက်လမ်း”ကဗျာကို ဝေဖန်ရေးဆရာသုံးဦးက အဓိပ္ပါယ်သုံးမျိုးအထိ ကွဲပြားခြားနားစွာအနက်ပြန်နိုင်တာမျိုးပဲ။အဆိုပါသုံးမျိုးမှာ မောင်ချောနွယ်ပြောချင်ခဲ့တဲ့မတ်ဆေ့ခ်ျနဲ့ အတိကျဆုံးတိုက်ဆိုင်တာတစ်ခုသာရှိမှာဖြစ်ပေမယ့် အခြားနှစ်ခုကိုလည်း မှားယွင်းတယ်လို့ မဆိုလိုနိုင်ဘူး။ ကဗျာဟာဒါပေးလို့ ဒါယူပါဆိုတဲ့ ဘောင်ကန့်ထားတဲ့အနုပညာမျိုးမဟုတ်တာ သေချာတယ်။ ဒီလိုပဲ ကဗျာဝေဖန်သူတစ်ယောက်ဟာမူရင်းကဗျာဆရာက ဒါကိုဆိုလိုပါတယ်လို့ အတိအကျပြောခွင့်မရှိဘဲ ကဗျာဆရာပြောချင်တာကို ကျွန်တော်ကဒါလို့မြင်ပါတယ်လို့ “သူ့ရဲ့ကိုယ်ပိုင်အနက်ပြန်ခြင်းဖြစ်စဉ်” ထဲကသာ ဝေဖန်ခွင့်ရှိမှာဖြစ်တယ်။

ဒါကြောင့် လွန်းဆက်နိုးမြတ်ရဲ့ “လာပါပြီ ဗမာပြည် လူမှုလိင်တစ်ပုဒ်” ကဗျာမှာလည်း ကဗျာဆရာ ဘာပြောခဲ့သလဲဆိုတာထက်ကဗျာဆရာပြောသွားတဲ့အထဲက ဘာတွေကိုကျွန်တော်မြင်ခဲ့သလဲဆိုတာကို အဓိကထား သုံးသပ်သွားမှာပါ။
…………………………………………………………………………………………………………………………

ကဗျာဆီ စတင်ချဉ်းကပ်ကြပါစို့။

ကျွန်မလို့ပဲ ပြောပါရစေ

ပထမဆုံးအဖွင့်စာကြောင်းမှာပဲ ကဗျာဆရာဟာ တွေးစရာတစ်ချို့ စတင်ပေးတယ်။ဘာကြောင့် “ကျွန်မ ပြောပါရစေ” လို့ ရိုးရိုးရှင်းရှင်းသုံးနှုန်းနိုင်ပါရက်နဲ့ “ကျွန်မလို့ပဲပြောပါရစေ” လို့ ရေးရသလဲ။ ဒီဝါကျနှစ်ခုဟာ အဓိပ္ပါယ်အားဖြင့် အတိုင်းအတာတစ်စုံတရာကွာဟမှုရှိနေတာဖြစ်ပြီးဒီကွာဟမှုကြားမှာ ကဗျာဆရာဟာ သူပေးချင်တဲ့ သတင်းအချက်အလက်မတ်ဆေ့ခ်ျတစ်ခု ပြထားခဲ့တာလို့ရိုးစင်းစွာတွေးနိုင်တယ်။ ကျွန်တော့်အဓိပ္ပါယ်ဖွင့်ဆိုမှုအရတော့ (ကျွန်မလို့ပဲ ပြောပါရစေ) ဟာ အဓိပ္ပါယ်နှစ်ခွယူလာတယ်။ပထမတစ်ခုက ကဗျာထဲက “ကျွန်မ” ဟာ ကျွန်မရဲ့အကြောင်းစတင်ပြောပြဖို့ ခွင့်တောင်းတာ။ ဒီနေရာမှာအဲဒီ “ကျွန်မ” ပြောချင်ခဲ့တဲ့ ကျွန်မအကြောင်းဟာ ဂုဏ်ယူရမယ့်အကြောင်းမျိုး၊ ၀မ်းသာဝေမျှရမယ့်အကြောင်းမျိုးလိုအပေါင်းလက္ခဏာပြ အချင်းအရာမဟုတ်ဘူး။ ကျွန်မဟာ ၀မ်းနည်းစရာ၊ စိတ်ထိခိုက်စရာတစ်ခုခု ပြောတော့မှာ။ကျွန်မဟာ အဲဒီအတွက်လည်း အားတင်းထားရတယ်။ သို့တည်းမဟုတ် ကျွန်မဟာ ဒါကျွန်မရဲ့အဖြစ်အပျက်မဟုတ်ပါဘူး၊အခြားတစ်ယောက်အကြောင်းပါလို့ လွှဲဖယ်ကွေ့ပတ်လိုက်ရမလား စဉ်းစားကောင်းစဉ်းစားမိနေမယ်။နောက်ဆုံးမှာတော့ အမှန်အတိုင်းပဲပြောပြတော့မယ်လို့ အားယူလိုက်ရင်း ဒါဟာ တကယ်တော့ကျွန်မရဲ့အဖြစ်အပျက်ပါ၊ကျွန်မကိုတော့ ကျွန်မအဖြစ်နဲ့ပဲ သိထားပါဆိုပြီး ဘယ်သူဘယ်ဝါဆိုတဲ့ကိုယ်ပိုင်သီးခြားလက္ခဏာကိုရှောင်ရှားလိုတဲ့သဘောမျိုးနဲ့ (ကျွန်မလို့ပဲပြောပါရစေ)လို့ အစချီလိုက်တာပဲ။ ဒုတိယတစ်ခုကတော့ ကျွန်မဆိုတဲ့ နမ်စားဟာရင့်ကျက်မှု၊ ကြီးရင့်မှုတို့ကို ညွှန်းပြနေတယ်။ ကျွန်မဟာ သူ့ကို ငယ်ရွယ်တဲ့မိန်းမပျိုတစ်ဦး၊မြီးကောင်ပေါက်တစ်ဦးအဖြစ်မဟုတ်ဘဲ အရွယ်ရောက်မိန်းမသားတစ်ဦးအဖြစ် ရှုမြင်စေလိုတဲ့သဘောနဲ့သုံးနှုန်းတာမျိုးဖြစ်တယ်။

ကျွန်မကို သူတို့ မကြိုဆိုကြဘူး။
ကျွန်မကို သူတို့ ရွံရှာစက်ဆုပ်တဲ့ အကြည့်နဲ့ ကြည့်တယ်။
ကျွန်မကို သူတို့ ပါးစပ်ကနေ မကြားတကြား လှောင်ပြောင်သရော်တယ်။

ကျွန်မဟာ စကားတွေဆက်ပြောပြီ။ဒီဝါကျသုံးကြောင်းစလုံးမှာ ကျွန်မဟာ ပြုလုပ်ခံ (Object) နေရာက ရှိနေတာသတိထားမိတယ်။ကျွန်မဟာ တစ် ကြိုဆိုခြင်းမခံရဘူး၊ နှစ် ရွံရှာစက်ဆုပ်စွာအကြည့်ခံရတယ်၊ သုံး လှောင်ပြောင်သရော်ခံရတယ်။ရွံရှာစက်ဆုပ်သည်နဲ့ လှောင်ပြောင်သရော်သည်ဆိုတဲ့ ကြိယာနှစ်ခုဟာ အဓိပ္ပါယ်အားဖြင့်အပြန်အလှန်ထောက်ခံညီညွတ်မှုရှိကြပြီးတူညီတဲ့ခေါင်းစဉ်တစ်ခုအောက်မှာ ထည့်ထားလို့ရပေမယ့် ကြိုဆိုသည်ကတော့ အနည်းငယ်ကွဲပြားမှုရှိနေတယ်။(ကျွန်မကို သူတို့ မကြိုဆိုကြဘူး) ဆိုတဲ့ဝါကျရဲ့လေသံကိုကောက်ယူရင်မူလအစမှာတော့ ကျွန်မဟာ သူတို့ကြိုဆိုကြလိမ့်မယ်လို့ ယူဆထားခဲ့တယ်၊ သို့မဟုတ် မကြိုဆိုခြင်းခံရလောက်စရာအပြစ်တစ်ခုခုလို့ တွေးထင်မထားခဲ့ဘူး။ သို့သော်လက်တွေ့မှာတော့ ကျွန်မဟာ ကြိုဆိုခြင်းမခံရတဲ့အပြင်နောက်ဆက်တွဲအဖြစ် ရွံရှာစက်ဆုပ်စွာအကြည့်ခံရခြင်း၊ လှောင်ပြောင်သရော်ခံရခြင်းတို့နဲ့ပါရင်ဆိုင်ခဲ့ရတယ်။ ဒါကြောင့် ကျွန်မရဲ့ ထိခိုက်ကြေကွဲရိပ်ထဲမှာ အနည်းငယ်အံ့အားသင့်သံစွက်နေခဲ့တယ်။

မဟုတ်ဘူး မဟုတ်ဘူး ကျွန်မကိုသူတို့ထဲက တစ်ယောက်ယောက်
မဟုတ်ဘူး မဟုတ်ဘူး ကျွန်မကို သူတို့အားလုံးပဲ

ကဗျာဆရာရဲ့ရေးဖွဲ့မှုဟာနှစ်လိုစရာပဲ။ ပထမတစ်ကြောင်းမှာ (မဟုတ်ဘူး မဟုတ်ဘူး)လို့ ကျွန်မဟာ အော်ပြောလိုက်တယ်။ကျွန်မကို လှောင်ပြောင်တာ၊ ရွံရှာစက်ဆုပ်စွာကြည့်တာ “သူတို့” အထဲက တစ်ယောက်ယောက်လုိ့ကျွန်မ ထင်နေသေးတယ်။ နောက်တစ်ကြောင်းမှာတော့ ကျွန်မဆီက (မဟုတ်ဘူး မဟုတ်ဘူး)ဆိုတာကိုပိုမိုပြင်းထန်တုန်ရီတဲ့အသံတစ်ခုအဖြစ် မြင်ကြည့်လိုက်တယ်။ ကျွန်မကို လှောင်ပြောင်သူတွေ၊ရွံရှာစက်ဆုပ်သူတွေဟာ “သူတို့ထဲကတစ်ယောက်ယောက်” သာမကတော့ဘဲ “သူတို့အားလုံး” ဖြစ်နေတာကိုကျွန်မ သိသွားခဲ့လို့ပဲ။ (ဒီနေရာမှာ “သူတို့” ဟာ ဘယ်သူဘယ်ဝါဆိုတာ ရေရာစွာမသိရပေမယ့်ဒီနေရာမှာတော့ ကျွန်မရဲ့ပတ်ဝန်းကျင်နဲ့ ကျွန်မရှင်သန်နေထိုင်ရာ လူ့အဖွဲ့အစည်းအဖြစ်သာပုံဖော်ယူဆရမယ်လုိ့မြင်တယ်။ လက်ရှိအထိမှာတော့ ကဗျာဆရာဟာ ကျွန်မနဲ့ လူ့အဖွဲ့အစည်းကြားကပဋိပက္ခတစ်စွန်းတစ်စကို စတင်ပုံဖော်နေပါပြီ)

ကျွန်မ အပြာကားတွေ ကြိုက်တယ်။ 
ကျွန်မ အပြာကားတွေ မကြာခဏ ကြည့်ဖြစ်တယ်။
ကျွန်မ မိန်းခလေးသူငယ်ချင်းတွေကိုလည်း ခေါ်ပြဖြစ်တယ်။

ဒီစာကြောင်းတွေက ကဗျာဖတ်သူကိုရှော့ခ်တစ်ခု စတင်ပေးတော့တာပဲ။ ကျွန်မဟာ အပြာကားတွေကြိုက်တယ်ဆိုတဲ့ စာကြောင်းဟာ တစ်လျှောက်လုံးအစပျိုးလာခဲ့သမျှအတွက်အဖြေတစ်ခုထုတ်ပေးလိုက်တယ်။

အထင်မလွဲပါနဲ့။ 
ကျွန်မဟာ ဗမာမိန်းခလေးပါ။
ကျွန်မဟာ မိကောင်းဖခင်သားသမီးပါ။
ကျွန်မဟာ သာမန်တက္ကသိုလ်ကျောင်းသူတစ်ဦးပါ။
ကျွန်မအသက် ၁၈ နှစ်လည်း ပြည့်ပြီးပါပြီ။

ဒီနေရာမှာ တွေးစရာတွေ တသီတသန်းကြီးရှိလာပြီ။ ကျွန်မအနေနဲ့ ဘာကြောင့် အထက်ပါစာကြောင်းတွေကို ပြောပြခဲ့ရတာလဲ။ ပြောပြဖို့တကယ်လိုအပ်ပါရဲ့လား။ သို့သော် ထုတ်ဖော်ပြောပြပုံကိုထောက်ရင် ကျွန်မအတွက်ကတော့ ဒီအချက်တွေကိုအသိပေးဖို့လိုအပ်တယ်လို့ထင်နေဟန်တူခဲ့သလို ကဗျာဖတ်သူအနေနဲ့လည်း ဒီအကြောင်းအရာတွေကိုအခြေပြုပြီး ဆက်လက်ချဲ့ထွင်စဉ်းစားဖို့အလွန်သတိပြုလာရတော့တယ်။ ဒီစာကြောင်းငါးကြောင်းဟာ ကျွန်မရင်ဆိုင်နေရတဲ့အကျပ်အတည်းကိုအနီးကပ်ဆုံးအောက်ခြေအထိ တူးဆွကြည့်နိုင်ဖို့အတွက် ကဗျာတစ်ပုဒ်လုံးမှာ အရေးပါဆုံးစာကြောင်းတွေဖြစ်ခဲ့တယ်။ တစ်နည်းအားဖြင့် ကျွန်မကို ပြန်လှန်မေးခွန်းထုတ်ရတော့မှာ။ ကျွန်မရဲ့ဆန့်ကျင်ဘက်အထိရောက်အောင်သွားကြည့်ရတော့မှာ။ ကျွန်မဟာ ဗမာမိန်းကလေးမဟုတ်ခဲ့ရင်ရော၊ တက္ကသိုလ်ကျောင်းသူမဟုတ်ခဲ့ရင်ရော၊မိကောင်းဖခင်သားသမီးမဟုတ်ခဲ့ရင်ရော ထူးခြားပြောင်းလဲချက်တစ်စုံတရာရှိမှာလား ဆိုတာ ထည့်သွင်းစဉ်းစားစရာကောင်းလာတယ်။

တကယ်တော့ ကျွန်မဟာ ဇီဝဗေဒရှုထောင့်၊လူမှုသိပ္ပံရှုထောင့်နဲ့ စိတ်ပညာရှုထောင့်တို့ကကြည့်ရင် ဆီလျော်မှုမရှိလှတဲ့ ဒီစာကြောင်းတွေဟာတစ်ဆင့်ပဲသူ ရင်ဆိုင်နေရတဲ့ စိတ်ပိုင်းဆိုင်ရာမလုံခြုံမှုကို ဖွင့်ဟသွားတယ်။ “အထင်မလွဲပါနဲ့” လို့ တိုးလျှိုးခဲ့တဲ့ကျွန်မဟာ ဖယ်ထုတ်ခံရခြင်း (Marginalization) နဲ့ တံဆိပ်ကပ်အသရေဖျက်ခံရခြင်း(Stigmatization) တို့ကို စိုးရွံ့ကြောက်လန့်နေခဲ့တဲ့ အရိပ်လက္ခဏာပြတယ်။ ဒါကြောင့် ကျွန်မဟာအများထဲကတစ်ယောက်အနေနဲ့ ပုံမှန်ရှိခြင်း (Normalcy) ကို သက်သေပြနိုင်ဖို့ကြိုးစားနေတာပဲ။သို့သော် ကျွန်မရဲ့ ကြိုးစားအားထုတ်မှုနဲ့ အကြောင်းပြချက်တွေဟာ ကျိုးကြောင်းဆီလျော်မှုကင်းမဲ့နေခဲ့တယ်။ဥပမာ တက္ကသိုလ်ကျောင်းသူ ဖြစ်ခြင်းမဖြစ်ခြင်းနဲ့ လိင်ဖျော်ဖြေရေးရုပ်ရှင်ကြည့်တာလိုလိင်ပိုင်းဆိုင်ရာစေ့ဆော်နှိုးဆွမှုရှိခြင်းဖြစ်စဉ်ဟာ သပ်သပ်စီပဲ။ မိကောင်းဖခင်သားသမီးဟုတ်မဟုတ်ဆိုတာကိုလည်းလိင်မှုဆိုင်ရာစာပေ၊ ရုပ်ရှင်စတဲ့ မီဒီယာတွေနဲ့ထိတွေ့မှုရှိမရှိအပေါ် အခြေပြုပြီး ဆုံးဖြတ်လို့ရနိုင်တာမဟုတ်ဘူး။“မိကောင်းဖခင်သားသမီး” ဆိုတဲ့ ဝေါဟာရကိုယ်တိုင်က အငြင်းပွားစရာအများအပြား ရှိနေတာပါ။

ကျွန်မရဲ့စကားတွေဟာ တကယ့်ဖြစ်ရပ်နဲ့ ကျိုးကြောင်းဆီလျော်ဆက်စပ်မှုကင်းနေတယ်လို့ဆိုခဲ့တယ်။ ဒါဟာ ကဗျာကိုဖတ်ရှုပြီးနောက် ကဗျာပြင်ပမှာ ကျွန်တော့်ဘာသာ ချမှတ်လိုက်တဲ့ကောက်ချက်သက်သက်ပဲ။ ကဗျာထဲက ကျွန်မအတွက်ကတော့ ဒါကိုဆီလျော်မှုမရှိလို့ မတွေးဘူး၊ မတွေးတဲ့အပြင်ဒါတွေကို ရေနစ်ရာမှာဆွဲတဲ့ ကောက်ရိုးမျှင်တွေလိုပါ ယူသုံးခဲ့တာ။ ဒီဖြစ်စဉ်မှာ တစ်စုံတရာချို့ယွင်းလွဲမှားချက်တော့ရှိနေခဲ့ပြီ။ ကျွန်မ ပေးခဲ့တဲ့ဆင်ခြေတွေဟာ ကျိုးကြောင်းဆီလျော်မှုမရှိပါလို့ဆိုရင်အဆိုပါကျိုးကြောင်းမဆီလျော်မှုတွေကို ထုတ်လုပ်ပေးခဲ့တဲ့ သူရဲ့သိမှုအဆောက်အုံအပေါ် အခြားထပ်ဆင့်လွှမ်းမိုးထားတဲ့လူမှုထုံးတမ်း (Social Customs) နဲ့ စံနှုန်းသတ်မှတ်ချက် (Norms) တွေကိုပါ ထည့်သွင်းဆက်စပ်ရတော့မှာ။အကြောင်းရင်းကတော့ လူ့အဖွဲ့အစည်းတစ်ခုအတွင်းက အဆိုပါထုံးတမ်းနဲ့စံနှုန်းတွေဟာ အဖွဲ့အစည်းရဲ့တည်ဆဲမျှခြေနဲ့ပုံမှန်တသမတ်လည်ပတ်ရေးအတွက် တာဝန်ယူထားကြတာဖြစ်ပြီး လူသားတစ်ဦးချင်းစီကို ဖိနှိပ်လွှမ်းမိုးမှုနဲ့ပုံသွင်းမှုပြုထားရုံမကအဆိုပါလူသားကိုလည်း သူတို့ရဲ့ကန့်သတ်ချက်ဘောင်ထဲက ကျော်လွန်ထွက်မသွားဖို့ အမြဲမပြတ်သတိပေးနေတယ်။
ကျော်လွန်ထွက်သွားတဲ့အခါမှာလည်း အဆိုပါလူသားကို တံဆိပ်(Stigma)တစ်ခုကပ်ခြင်း နည်းလမ်းနဲ့တုံ့ပြန်တော့မှာ။ စာရေးဆရာနဲ့ လူမှုသိပ္ပံပညာရှင် အာဗင်ဂေါ့ဖ်မဲန်းကတော့ အမှတ်အသားတံဆိပ်ကပ်ခြင်းဆိုတာ“တစ်စုံတစ်ယောက်ဟာ အခြားသူတွေနဲ့ကွဲပြားခြားနားကြောင်း ဖော်ထုတ်ခြင်းဖြစ်ပြီး အဆိုပါလူကိုလည်းမနှစ်မြို့စရာအမျိုးအစားအဖြစ် ရှုမြင်လာစေတယ်” လို့ ဆိုတယ်။ တံဆိပ်ကပ်ခြင်း (Stigmatization) နောက်မှာလည်း ထိုသူကို အများကြားမှ ဖယ်ထုတ်ခြင်း (Marginalization) လည်း ပါလာတော့မှာဖြစ်တယ်။ ဒါကြောင့် လူ့အဖွဲ့အစည်းအတွင်းက လူသားတွေဟာတံဆိပ်ကပ်ခံရခြင်းကိုရှောင်ရှားဖို့ သူတို့ဟာ လှုမှုထုံးတမ်းနဲ့ စံတွေကို သွေဖီသွားခြင်းမရှိကြောင်းဖော်ထုတ်သက်သေပြရေး ကြိုးစားနေရတယ်။ ကဗျာထဲက “ကျွန်မ” ပြောသွားခဲ့တဲ့ အကြောင်းပြချက်တွေဟာသူ့ကိုယ်သူ ပြန်လည်နှစ်သိမ့်ဖို့ထက်စာရင် သူနေထိုင်တဲ့ပတ်ဝန်းကျင်က လူ့အဖွဲ့အစည်းဆိုင်ရာမျှော်လင့်ချက်တွေ (Societal Expectations) ကို ပြည့်မီအောင် ကြိုးပမ်းချက်အဖြစ်သာကောက်ချက်ချလိုတယ်။

ကျွန်မမှာ ယောကျာ်းလေးသူငယ်ချင်းတစ်ယောက်ရှိတယ်။
သူနဲ့ ကျွန်မ ကျောင်းကင်တင်းအတူထိုင်တယ်။
သူနဲ့ ကျွန်မ နေရာအတော်များများ တွဲသွားတွဲလာတယ်။
သူနဲ့ ကျွန်မ စကားတွေ အများကြီးပြောတယ်။ 

ဒီနေရာမှာ ကျွန်မက အခြားဇာတ်ကောင်တစ်ဦးဖြစ်တဲ့ ယောက်ျားလေးသူငယ်ချင်းကိုကဗျာထဲခေါ်သွင်းလာခဲ့ပြီ။ ကျွန်မဟာ သူနဲ့ ယောက်ျားလေးသူငယ်ချင်းအကြားက ဆက်သွယ်ချက်ကိုပြောပြတယ်။

ဒါပေမယ့် သူနဲ့ ကျွန်မဘာမှ မဟုတ်ဘူး။
သူနဲ့ ကျွန်မ အပြာကားလည်း အတူမကြည့်ဖူးဘူး။
ကျွန်မဟာ မိကောင်းဖခင်သားသမီးလေ။

ဒါပေမယ့် ကျွန်မနဲ့ ယောက်ျားလေးသူငယ်ချင်းနဲ့ဆက်သွယ်မှုအတိုင်းအတာမှာ လိင်မှုကိစ္စမပါဝင်ကြောင်း ရှင်းလင်းအသိပေးတယ်။ မိကောင်းဖခင်သားသမီးဆိုတဲ့အသုံးအနှုန်းကိုလည်းဒုတိယအကြိမ် ထပ်ကျော့အသုံးပြုတာကို တွေ့ရတယ်။ ကျွန်မက သူဟာ လိင်ဖျော်ဖြေမှုဇာတ်ကားတွေကိုနှစ်သက်ကြောင်း၊ ဒါကြောင့် လှောင်ပြောင်သရော်ခံရကြောင်း၊ ရွံရှာစက်ဆုပ်စွာအကြည့်ခံရကြောင်းတို့ပြောခဲ့အပြီးမှာသူ့ကိုယ်သူ မိကောင်းဖခင်သားသမီးအဖြစ် ဆက်လက်ယူဆထားဆဲလို့ ကောက်ချက်ချနိုင်တယ်။

သူရည်းစားရသွားတော့ ကျွန်မဘယ်လိုမှမခံစားခဲ့ရဘူး။
သူနဲ့လည်း ကျွန်မ အရင်လို သိပ်မတွဲဖြစ်တော့ဘူး။
ကျွန်မ အပြာကားတွေ ကြိုက်လို့ ကြည့်တာ၊
ကျွန်မရဲ့ ယောကျာ်းလေးသူငယ်ချင်း ရည်းစားရသွားလို့
ကျွန်မတို့ သိပ်မတွဲဖြစ်တော့တာ၊ စတဲ့ စတဲ့ ဖြစ်စဉ်တွေဟာ
ကျွန်မအတွက်တော့ ထမင်းစားရေသောက် သမာရိုးကျဖြစ်စဉ်တွေပဲ။
ဒါပေမယ့် အားလုံးက ကျွန်မအစား ၀ိုင်းခံစားကြတယ်။
အားလုံးက ကျွန်မကို ၀ိုင်းသနားကြတယ်။

ကျွန်မရဲ့စကားတွေက ထပ်ဆင့်အနက်ပြန်စရာမလိုလောက်အောင်ရှင်းလင်းနေခဲ့ပါပြီ။ ကျွန်မက ဒီအဖြစ်အပျက်တွေဟာ ထမင်းစားရေသောက် သမာရိုးကျဖြစ်စဉ်တွေလို့ပြောပြသွားတယ်။ သို့သော် “အားလုံး” ကတော့ ဒါကိုလွဲမှားစွာအနက်ကောက်တယ်(ဒီနေရာမှာ “အားလုံး” ဆိုတဲ့စကားလုံးဟာ အထက်မှာသုံးခဲ့တဲ့ “သူတို့”နာမ်စားနဲ့အတူတူဖြစ်တယ်လို့ယူနိုင်စရာရှိတယ်)။ အားလုံးက ကျွန်မအတွက် ၀မ်းနည်းကြေကွဲကြတယ်၊ အားလုံးက ကျွန်မကိုသနားခဲ့ကြတယ်။ ဘာကြောင့်လဲ။ အားလုံးအမြင်မှာ ယောက်ျားလေးသူငယ်ချင်းဟာ ကျွန်မရဲ့လိင်နှိုးဆွမှုတွေအကြောင်းသိသွားခဲ့လို့စွန့်ပစ်ခဲ့ပြီး ချစ်သူရသွားတာလို့ ယူဆထားတာကြောင့် ဖြစ်ကောင်းဖြစ်နိုင်တယ်။

အားလုံးက ကျွန်မကို ၀ိုင်းသနားကြတယ်။
ကျွန်မ ဘာတစ်ခုမှ မခံစားနေမှန်းသိတော့
သူတို့အားလုံး ကျွန်မအပေါ် အချိုးပြောင်းသွားပြန်တယ်။
ကျွန်မအပေါ် သူတို့အားလုံး ကြောက်စရာကောင်းလောက်အောင်
တစ်ဖက်သတ်ကောက်ချက်ဆွဲလိုက်တယ်။
ကျွန်မဟာ "စံ"လွဲနေတယ်။ ကျွန်မဟာ "တစ်ခု"လိုနေတယ်။

ဒီစာကြောင်းတွေအားလုံးဆုံးသွားတဲ့အခါကျွန်တော့်စိတ်ထဲအရင်ဆုံး ၀င်လာတာက “ကျွန်မ”နေထိုင်ရာလူ့အဖွဲ့အစည်းမှာ လိင်ကွဲပြားမှုအလိုက် “အပိုဆောင်းမျက်နှာပေးမှု”တစ်မျိုး (Idiosyncrasy Credit) ရှိနေခြင်းကိုသတိပြုမိတာပဲ။ ဒါကြောင့် ကျွန်မနဲ့ ကျွန်မနေထိုင်တဲ့ လူ့အဖွဲ့အစည်းသည် မဟာပုရိသအမြင်လွှမ်းမိုးတဲ့အဖွဲ့အစည်း(Patriarchal Society) လို့ ကောက်ချက်ချလိုက်တယ်။ အထက်မှာ အပိုဆောင်းမျက်နှာသာပေးခြင်းလို့ဆိုခဲ့တဲ့ အီဒီယိုဆင်ကရာစီခရက်ဒစ်ကို ရှင်းလင်းရရင် လူတစ်ဦးတစ်ယောက်ချင်းအလိုက် လူမှုစံနှုန်းတွေဆီကနေသွေဖီနိုင်ခွင့်ကိုဆိုလိုတယ်။
ဥပမာအားဖြင့် ယေဘူယျ စာတော်တဲ့ကျောင်းသားနဲ့ ညံ့ဖျင်းတဲ့ကျောင်းသားအုပ်စုနှစ်မျိုးရှိမယ်ဆိုပါစို့၊ အဆိုပါအုပ်စုနှစ်ခုဟာ တူညီတဲ့ပြစ်မှုတစ်ခုကို ကျူးလွန်တဲ့အခါဆရာတွေအနေနဲ့ပြစ်ဒဏ်ချရာမှာ စာတော်တဲ့ကျောင်းသားအုပ်စုထံ အနည်းငယ်မျက်နှာသာပေးမှုရှိမှာဖြစ်တယ်။ညံ့ဖျင်းတဲ့ကျောင်းသားအုပ်စုအတွက်တော့ လိုအပ်သည်ထက် အနည်းငယ်ပိုကဲတဲ့ တုံ့ပြန့်မှုမျိုးရနိုင်တယ်။
အလားတူဘဲ မဟာပုရိသအမြင်လွှမ်းမိုးတဲ့အဖွဲ့အစည်းတစ်ခုမှာလည်း လူမှုစံနှုန်းနဲ့တန်ဖိုးအမြင်တွေဟာဖိုဝါဒအပေါ် အခြေပြုထားတာဖြစ်ပြီး နယ်ပယ်အများစုတို့မှာ အမျိုးသမီးအသံ (Women’sVoice) လစ်ဟာနေခဲ့တယ်။ ဒါကြောင့် လွှမ်းမိုးကြီးစိုးဆဲစံတွေက လိင်အရတူညီမှုကိုပစ်ပယ်ပြီးလိင်ကွဲပြားမှုအလိုက် မတူညီတဲ့အတိုင်းအတာများနဲ့ စံသွေခြင်းဖြစ်စဉ်ကို ကိုင်တွယ်တော့မှာ။ဒီဖြစ်စဉ်ကို ဟောင်းဝပ်ဘက်ကာက သူ့ရဲ့နာမည်ကျော် တံဆိပ်ကပ်ခြင်းသီအိုရီ (LabellingTheory) မှာ “လွှမ်းမိုးဆဲအုပ်စုတွေက လွှမ်းမိုးခံအုပ်စုအတွက် ဘယ်အပြုအမူမျိုးဟာ လက်ခံနိုင်တယ်၊ဘယ်အပြုအမူမျိုးက မလျော်ညီဘူးစတာတွေကို သတ်မှတ်ဆုံးဖြတ်နိုင်တဲ့ပါဝါကို ချုပ်ကိုင်ထားတယ်”လို့ ဆိုတယ်။ ကျွန်မနေရာမှာ ယောက်ျားလေးတစ်ဦးသာဖြစ်ခဲ့မယ်ဆိုရင် ကွဲပြားတဲ့တုံ့ပြန်မှုတစ်မျိုးပေါ်ထွက်လာမှာအသေအချာပဲ။

“အမျိုးသမီးတစ်ယောက်ဟာ မွေးဖွားလာတာမဟုတ်ဘူး၊ အမျိုးသမီးအဖြစ်ပြုလုပ်ခြင်းခံရတာ။ အဆိုပါပြုလုပ်ခြင်းဖြစ်စဉ်မှာပဲ သူ့ရဲ့လူသားဆန်မှုကိုဖျက်ဆီးခံလိုက်ရတယ်။သူဟာ ‘အမျိုးသမီး’ တံဆိပ်နဲ့ အမှတ်သင်္ကေတတွေ ဖြစ်လာခဲ့တယ်။ သူမဟာ ကမ္ဘာကြီးရဲ့မိခင်ဖြစ်မယ်၊ဒါမှမဟုတ်ရင် စကြ၀ဠာရဲ့အဆိုးရွားဆုံး မိန်းမပျက်တစ်ဦး ဖြစ်ရင်ဖြစ်မယ်။ သို့သော် သူမစစ်စစ်ဖြစ်ပိုင်ခွင့်ကိုတော့ ပိတ်ပင်တားဆီးခံထားရတယ်”

အထက်ပါစကားတွေကိုပြောခဲ့သူကတော့ က္ကုတ္ထိယ၀ါဒီဖြစ်တဲ့ အန်ဒရီယာဒွါကင်ပါ။အလားတူသဘောဆောင်တဲ့အမြင်မျိုးကို ဆိုင်မွန်ဒီဗူဗွားလည်း ပြောခဲ့ဖူးတယ်။ အမျိုးသမီးတွေဟာလူမှုပြဌာန်းချက်နဲ့သင်ကြားမှုတွေကြောင့် “မိန်းမ” တစ်ဦး ဖြစ်လာခဲ့ရပြီး သူ့ကိုသင်ကြားပြုလုပ်လိုက်တဲ့လူ့အဖွဲ့အစည်းတစ်ရပ်လုံးကလည်း အမျိုးသမီးဟာ သူတို့ချမှတ်ထားတဲ့ လူမှုပြဌာန်းချက်တွေအတိုင်းလိုက်လျောညီထွေလှုပ်ရှားဖိုိ့ကို မျှော်လင့်တယ်။

အားလုံးက ကျွန်မကို ၀ိုင်းသနားကြတယ်။
ကျွန်မ ဘာတစ်ခုမှ မခံစားနေမှန်းသိတော့
သူတို့အားလုံး ကျွန်မအပေါ် အချိုးပြောင်းသွားပြန်တယ်။

အထက်ပါစာကြောင်းတွေကိုကြည့်ပါ။အားလုံးက ကျွန်မကို သနားကြတာ၊ သနားစရာသတ္တ၀ါတစ်ကောင်အဖြစ် ဆက်ဆံကြတာ။ အားလုံးက ကျွန်မဟာလိင်စိတ်ချို့ယွင်းမှုရှိနေတဲ့ မိန်းကလေးတစ်ဦးအမြင်မြင်တာ။ နောက်ပြီး အားလုံးက ကျွန်မဆီက၀မ်းနည်းမှုနဲ့ နာကြင်ကြေကွဲမှုတို့ကို မြင်ရဖို့ မျှော်လင့်တာ (တစ်နည်းအားဖြင့် ကျွန်မဟာစံလွဲနေတဲ့လူသားတစ်ဦးအဖြစ် ထိခိုက်နာကျင်ရပြီး မိမိဘာသာပြစ်ဒဏ်သင့်မှုကို မြင်ချင်ကြတာ)။လက်တွေ့မှာ ကျွန်မဘက်က ဘယ်လိုမှုခံစားမှုမပြတဲ့အခါမှာတော့ အားလုံးက ထိတ်လန့်ချောက်ခြားကုန်ကြတယ်။မိန်းမသားတစ်ဦးဟာ မိန်းမသားအဖြစ် ပြုလုပ်သင်ကြားခံခဲ့ရတဲ့အလေ့တွေအတိုင်း တုံ့ပြန်လိမ့်မယ်လို့ထင်ထားခဲ့ကြတာ။ တကယ်တမ်းကျတော့ ကျွန်မဟာ ခြားနားတဲ့တုံ့ပြန်မှုပေးခဲ့ပြီး အဆိုပါတုံ့ပြန်မှုကြောင့်ပဲအားလုံးဆီက ခါးသီးမှုတွေကို လက်ယပ်ခေါ်သလိုဖြစ်ရတော့တယ်။

ကျွန်မဟာ လိင်နဲ့ပတ်သက်ရင်မိမိလက်မိမိ အထူးသာယာသူ။
ကျွန်မဟာ ကျွန်မရဲ့ လိင်စိတ်ကို အပြာကားတွေကြည့်ပြီး
လက်နဲ့ ဖြေဖျောက်ရာမှာ အစွန်းရောက်သူတဲ့။
ကျွန်မဆီကို သတင်းစကားတွေဟာ ပုံစံမျိုးစုံနဲ့
ဆိုက်ဆိုက်မြိုက်မြိုက်ပြန်ရောက်လာတယ်။

တစ်ဖက်က ကျိုးကြောင်းဆင်ခြင်မှုဝါဒနဲ့အခြားတစ်ဖက်က သိပ္ပံပညာရဲ့တိုးတက်မှုအရှိန်အဟုန်တို့ဟာ လူ့အဖွဲ့အစည်းအများအပြားအတွင်းကမပြောအပ်မလုပ်အပ်လို့ တားမြစ်ထားခဲ့တဲ့ လူမှုသတ်မှတ်ချက်အစွဲ (Taboo) တွေကို ပျောက်ကွယ်စေခဲ့တယ်။ထင်ရှားကျော်ကြားတဲ့စိတ်ရောဂါအထူးကု သောမတ်ဆားစ်ရဲ့စကားတစ်ခွန်းကို ကိုးကားမယ်ဆိုရင်-

“မိမိဘာသာလိင်ဖျော်ဖြေမှုရယူခြင်း (Masturbation) ဟာ လူသားမျိုးနွယ်စုရဲ့ မူလပထမအကျဆုံး လိင်မှုနှိုးဆော်ချက်ဖြစ်တယ်။ ၁၉ ရာစုမှာ ရောဂါတစ်ခုအဖြစ် အမည်တပ်ခြင်းခံရပေမယ့် ၂၀ ရာစုမှာတော့ ဒါဟာဖြေဆေးတစ်ခု ဖြစ်လာခဲ့ပြီ” 
လို့ ဆိုတယ်။
ဒီနေရာမှာ ဆားစ်ပြောချင်ခဲ့တာက အတိတ်ကာလတုန်းကMasturbation ကို စိတ်ပိုင်းဆိုင်ရာ ဖောက်ပြန်မှု၊ ကိုယ်ကျင့်ပျက်ပြားမှုတို့အဖြစ် ရောဂါတစ်ခုလိုအယူအစွဲထားခဲ့ပေမယ့်သိပ္ပံပညာတိုးတက်လာတဲ့အခါ ဒါဟာသဘာဝအဖြစ် နားလည်လက်ခံလာကြတဲ့အပြင် စိတ်ပိုင်းဆိုင်ရာနဲ့ကျန်းမာရေးရှုထောင့်အရ အကျိုးကျေးဇူးတွေပါရှိကြောင်း ဖော်ထုတ်လာနိုင်ခဲ့ခြင်းကို ဆိုလိုတာပါ။သို့သော် ဆားစ်ရဲ့အမြင်နဲ့ ကဗျာထဲက ကျွန်မတို့ဟာ အထူးသဖြင့် ဆန့်ကျင်သွေဖီနေခဲ့ကြတယ်။ဆားစ်ပြောခဲ့တဲ့  Masturbation ကို လူသားရဲ့လိင်ပိုင်းဆိုင်ရာသဘာဝဖြစ်ရပ်အဖြစ်လက်ခံလာကြတဲ့ ၂၀ ရာစု တိုးတက်ပွင့်လင်းလူ့အဖွဲ့အစည်းထဲမှာ ကျွန်မနဲ့ ကျွန်မတုိ့ရဲ့လူ့အဖွဲ့အစည်းဟာပါဝင်ဟန်မတူဘူး၊ သို့မဟုတ် ပါဝင်လာဦးမယ့် လတ်တလောအလားအလာမရှိဘူး။ ဒါကြောင့် ကျွန်မရဲ့မိမိဘာသာလိင်ဖျော်ဖြေမှုရယူခြင်းကိစ္စဟာထူးခြားတဲ့သတင်းတစ်ပုဒ်လို အလျင်အမြန့်ကူးစက်ပြန့်နှံ့သွားရတာပဲ။

အခြေအနေက ပတ်တုပ်လို့ မရတော့ဘူး။
ကျွန်မရောက်လာရင် အခန်းထဲက ကောင်တွေက
ကျွန်မကို ခိုးခိုးကြည့်ပြီး တီးတိုးပြောကြတယ်။
ကျွန်မအနားက ကောင်မတွေကလည်း ရှောင်ဖယ်သွားတယ်။
ကျွန်မ ဒါကြီးကို ဘယ်သူ့ဆီ သွားရှင်းပြရမှာလဲ။
ကျွန်မ အဲသလို မရှင်းပြမိတာကပဲ အမှားလား။
ကျွန်မ နာကျင်လာတယ်။ ကျွန်မ ခံစားရတယ်။

လူမှုစံနှုန်းတွေ (Social Norms) ဟာ အများစုအားဖြင့်လူ့အဖွဲ့အစည်းတစ်ရပ်အတွင်း တရားဥပေဒအရ နည်းစနစ်တကျ ထည့်သွင်းပြဌာန်းထားတဲ့ စည်းမျဉ်းစည်းကမ်းတွေမဟုတ်ဘူး။ဒါကြောင့်လည်း လူမှုစံနှုန်းတွေဆီက သွေဖီခြင်း (Deviance) ဟာ ဥပဒေအရပြစ်ဒဏ်ပေးခံရခြင်းမျိုးကနေလွတ်ကင်းလေ့ရှိတယ်။ သို့သော် စံသွေသူ (The Deviant) ဟာ စံသွေခြင်းအတွက် လူ့အဖွဲ့အစည်းဆီကတုံ့ပြန်မှုနောက်ဆက်တွဲကိုတော့ မလွဲမသွေကြုံတွေ့ရမှာပဲ။ ဂျာမန်လူမျိုးသမိုင်းပညာရှင်ဖော့က်ကတော့ သူ့ရဲ့ပညာရပ်ဆိုင်ရာအရေးအသား STIGMA: How We Treat Outsiders မှာ -

“လူ့အဖွဲ့အစည်းအားလုံးတို့ဟာ အချို့သောအပြုအမူနဲ့အခြေအနေများကို မနှစ်မြို့စရာအဖြစ် အမှတ်အသားပြုတံဆိပ်ကပ်ပစ်လေ့ ရှိကြတယ်။ ဒီလိုလုပ်လိုက်ခြင်းအားဖြင့်သူတို့တစ်စုတစ်ဝေးထဲကနေ သူတို့သတ်မှတ်တဲ့စံနှုန်းတွေနဲ့မကိုက်ညီသူ အပြင်လူ(Outsider) များကို ဖယ်ထုတ်လိုက်တာဖြစ်ပြီး အဖွဲ့အစည်းရဲ့ပိုမိုစည်းလုံးမှုကိုဖြစ်စေတယ်” 

လို့ ရေးသားခဲ့တယ်။

ကျွန်မရဲ့ အဖြစ်သနစ်က အခန်းထဲတင်မကတော့ဘူး။
တစ်ကျောင်းလုံးကို ချက်ချင်းပျံ့နှံ့သွားတယ်။ကျွန်မကို တွေ့တဲ့သူတိုင်း ကျွန်မကို နှာခေါင်းရှုံ့ကြတယ်။ကျွန်မကို တချို့ကောင်တွေ  မသိမသာ လက်ခလယ်ထောင်ပြကြတယ်။ကျွန်မကို တချို့ကောင်မတွေ သိသိသာသာ မဲ့ရွဲ့ပြသွားကြတယ်။ကျွန်မကို ပိုဆိုးတဲ့ တချို့က မမြင်ဖူးလို့တောင် လာခိုးကြည့်ကြတယ်။

ဖော့က် ပြောသွားခဲ့တဲ့ လူ့အဖွဲ့အစည်းက စံသွေခြင်းဖြစ်စဉ်ကိုခါးသီးတုံ့ပြန်ရာမှာ အလိုလိုပူးပေါင်းဆောင်ရွက်ခြင်း ရယူတတ်မှုကို အထက်ပါစာကြောင်းတွေမှာမြင်တွေ့နိုင်တယ်။ ကျွန်မဟာ သံပူတံဆိပ်ကပ်နှိပ်ခံထားရတဲ့ အကျဉ်းသားဟောင်းတစ်ဦးလိုခါးသီးတဲ့ ခွဲခြားဆက်ဆံမှုကိုကြုံတွေ့လာရတယ်။ “သူတို့” အားလုံးဟာ ကျွန်မကို စံလွဲသူတစ်ဦးအဖြစ်သတ်မှတ်လိုက်ပြီးမနှစ်မြို့တဲ့တုံ့ပြန်မှုတွေ ပေးတော့တာ။ နှာခေါင်းရှုံ့ခြင်း၊ လက်ခလယ်ထောင်ပြခြင်း၊ မဲ့ရွဲ့ပြခြင်းတို့ကကျွန်မကို အဖွဲ့အစည်းအတွင်းက ဘေးဖယ်ထုတ်ပစ် (Marginalized) ဖို့ ကြိုးစားတဲ့ အပြုအမူတွေပဲ။တစ်နည်းအားဖြင့် ကျွန်မကို လိင်ပိုင်းဆိုင်ရာမူမမှန်တဲ့ စံလွဲသူတစ်ယောက်အဖြစ် အတိအလင်းတံဆိပ်ကပ်လိုက်တော့တာ။ပြောခဲ့သလို စံလွဲသူတစ်ယောက်က တရားဥပဒေအရအရေးယူမှုတစ်စုံတရာ မကြုံတွေ့ရပေမယ့် စိတ်ပိုင်းဆိုင်ရာဝန်ထုပ်ဝန်ပိုးကိုသယ်ဆောင်ရတော့တယ်။ အများထဲမှ ပုံမှန်လူတစ်ယောက်အဖြစ် အသိအမှတ်ပြုမခံရခြင်း၊ လူ့အဖွဲ့အစည်းအတွင်းကငြင်းပယ်ခံရခြင်း၊ တန်ဖိုးနှိမ့်ချခံရခြင်း၊ လှောင်ပြောင်ခံရခြင်း၊ ဝေဖန်တိုက်ခိုက်မှုကြုံရခြင်း၊ခွဲခြားဆက်ဆံမှုခံရခြင်းတို့ဟာ တံဆိပ်ကပ်ခံရခြင်း (Stigmatization) ရဲ့ နောက်ဆက်တွဲရလာဒ်တွေဖြစ်တယ်။အဲဒီလိုစိတ်ပိုင်းဆိုင်ရာဒဏ်ရာဒဏ်ရာတွေ များလာတာနဲ့အမျှ ကျွန်မ ကြုံတွေ့ရတဲ့ စိတ်ဒုက္ခဟာပိုမိုကြီးမားလာရတော့တယ်။

ကျွန်မ ပိုပိုပြီးနာကျင်လာတယ်။ကျွန်မ ပိုပိုပြီးခံစားရတယ်။
ကျွန်မရဲ့ အဖြစ်သနစ်က ကျောင်းထဲတင်မကတော့ဘူး။
သမ္မတရေဒီယိုမိန့်ခွန်းလိုပဲ တစ်နိုင်ငံလုံးပြန့်သွားတယ်။
ကျွန်မလိုင်းကားစီးရင်တောင် ဘေးထိုင်ခုံက လူ
ကျွန်မကို လှမ်းကြည့်နေတဲ့ အဓိပ္ပါယ်က ဘာလဲ။
ကျွန်မ အိမ်ပြန်လမ်းမှာ ရပ်ကွက်ထဲကလူတွေ
ကျွန်မကို ရိပ်ခနဲလှမ်းကြည့်တဲ့ အဓိပ္ပါယ်က ဘာလဲ။

ကျွန်မဆီမှာ စိတ်ပိုင်းဆိုင်ရာမတည်ငြိမ်မှုရဲ့ရောဂါလက္ခဏာ(Mental Disorder) ကို ပိုပြီးတွေ့လာရတယ်။ ကျွန်မ ပိုပိုပြီးနာကျင်လာတယ်လို့ငြီးတွားတယ်။ တစ်ဆက်တည်းမှာ ကျွန်မရဲ့စိတ်ပိုင်းဆိုင်ရာမလုံခြုံမှုဟာလည်း ဘတ်စ်ကားစီးနေချိန်မှာတောင်ဘေးထိုင်ခုံကလူတစ်ယောက်ရဲ့မျက်လုံးတွေကို သံသယ၀င်နေတာမျိုးရှိလာတယ်။ ရပ်ကွက်ထဲကလူတွေဟာဘာအဓိပ္ပါယ်နဲ့ ကျွန်မကိုကြည့်ကြတာလဲလို့ စိတ်ခံစားမှုပိုင်းဆိုင်ရာမလုံခြုံမှု(Emotional Insecurity) ကိုပြသလာတယ်။ “သမ္မတရေဒီယိုမိန့်ခွန်းလိုပဲ တစ်နိုင်ငံလုံးပြန့်သွားတယ်” ဆိုတဲ့ဝါကျမှာ လက်တွေ့ဖြစ်ရပ်နဲ့ဖြစ်နိုင်ချေတို့ထက်ချဲ့ကားမှုတွေ ပါဝင်နေသော်လည်း အဆိုပါချဲ့ကားမှုက ကျွန်မဆီကစိတ်ပျက်အားလျော့မှု အတိမ်အနက်နဲ့အချိုးကျနေတော့တယ်။

ဟင့်အင်း။ဟင့်အင်း။
ကျွန်မ စာသင်ခန်းထဲ မ၀င်ချင်ဘူး။
ကျွန်မ ကျောင်းထဲ မသွားချင်ဘူး။
ကျွန်မ ရပ်ကွက်ထဲ မသွားချင်ဘူး။
ကျွန်မ အခန်းပြင်တောင် မထွက်ချင်ဘူး။
ကျွန်မ အပြာကားတွေလည်း မကြည့်တော့တာ ကြာပြီ။
ကျွန်မ အခန်းထဲမှာ တစ်ယောက်တည်း ငိုနေတယ်။
ငိုင်နေတယ်။ ငူနေတယ်။ လူတွေနဲ့ တွေ့ရမှာ ကြောက်နေတယ်။

ဒီစာကြောင်းတွေကိုဖတ်ရှုအပြီးမှာတော့ ကျွန်တော်ဟာ ကဗျာထဲက“ကျွန်မ” ရဲ့ အရှုံးပေးမှုကို မြင်လိုက်ရတယ်။ လူ့အဖွဲ့အစည်းအတွင်း တံဆိပ်ကပ်ခံရခြင်းရဲ့နက်ရှိုင်းတဲ့စိတ်ပိုင်ဆိုင်းရာအကျိုးဆက်နဲ့ပတ်သက်ပြီး ပြင်သစ်စာရေးဆရာ အဲလ်ဘတ်မန်မီက၁၉၆၅ ခုနှစ်မှာ ရေးသားထုတ်ဝေတဲ့ The Colonizer & the Colonized မှာ ဒီလိုရှင်းပြခဲ့ဖူးတယ်။

“(စိတ်ပိုင်းဆိုင်ရာ)ဖိနှိပ်ထိုးနှက်တဲ့ကာလ ကြာရှည်လာတာနဲ့အမျှတံဆိပ်ကပ်ခံရသူအပေါ် အကျိုးသက်ရောက်နှုန်း ပိုများလာတာပါ။ နောက်ပိုင်းမှာ အဆိုပါဖိနှိပ်ထိုးနှက်ခံရမှုနဲ့အလွန်အသားကျရင်းနှီးလာပြီး ဒါဟာ သူ့ဖြစ်တည်မှုရဲ့ အစိတ်အပိုင်းတစ်ရပ်အဖြစ် အရှုံးပေးလက်သင့်ခံလိုက်တဲ့အပြင်ဒီအခြေအနေကနေ လွတ်မြောက်စရာလမ်းစ မရှိနိုင်တော့ဘူးလို့ပါ ခံယူလိုက်တော့တယ်။ အဲဒီလိုလက်သင့်ခံလိုက်ခြင်းအားဖြင့်တစ်ဖက်မှာ ဖိနှပ်တိုက်ခိုက်သူတွေက (သူတို့ရဲ့ရည်ရွယ်ချက်အထမြောက်ပြီး) အောင်ပွဲရလိုက်တာပဲ”

အခုလည်း ကဗျာထဲကကျွန်မဟာ သူ့ရဲ့အဖြစ်ဆိုးကနေ ပြန်လည်ရုန်းထွက်နိုင်ဖို့လမ်းမရှိတော့ဘူးလို့ အရှုံးပေးလိုက်တော့တယ်။ ကျွန်မဟာ ကျောင်းမသွားချင်ဘူး၊ ရပ်ကွက်ထဲမသွားချင်ဘူး၊ကျွန်မဟာ တစ်ယောက်တည်းငိုနေရတယ်။ ကျွန်မက လူတွေနဲ့တွေ့ရမှာကြောက်နေတယ်လို့ပြောလိုက်ခြင်းဟာကိုယ်ပိုင်သီးခြားလက္ခဏာနဲ့ အမှတ်အသားပျောက်ဆုံးမှု (Status Loss) ကို ညွှန်းပြနေတယ်။ဒါဟာ လူ့အဖွဲ့အစည်း၊ အုပ်စုတစ်ခုအတွင်းမှ ထုတ်ပယ်ခံရခြင်း (Social Exclusion) ရဲ့ အကျိုးဆက်ပဲ။ကျွန်မကို သူတို့ထဲကတစ်ယောက်အဖြစ်ကနေ သူတို့အားလုံးက ငြင်းပယ်လိုက်တော့တာ။ ကျွန်မဟာနေထိုင်ရာလူ့အဖွဲ့အစည်းရဲ့ လွှမ်းမိုးဆဲစံနှုန်းတွေ သတ်မှတ်ချက်တွေရဲ့ပြင်ပမှာ အခြားသောတံဆိပ်တစ်မျိုးနဲ့နေထိုင်နေရတဲ့အပြင်လူ သို့မဟုတ် The Other ဖြစ်နေတော့တယ်။

ကျွန်မရဲ့ ယောကျာ်းလေးသူငယ်ချင်းဟာ
ကျွန်မအိမ်ကို သူ့ရည်းစားနဲ့အတူ လာနှစ်သိမ့်တယ်။
ကျွန်မမိဘတွေနဲ့ မောင်နှမတွေက
ကျွန်မကို ကြည့်ပြီး စိတ်မကောင်းကြဘူး။
ကျွန်မ ဘာပြန်ပြောရမှာလဲ။ ကျွန်မ ဘာလုပ်ရမှာလဲ။
ကျွန်မ နေထိုင်တဲ့ လူမှုအဖွဲ့အစည်းကြီးဟာ မှားနေလား။
ဒါမှမဟုတ် ကျွန်မကပဲ မှားနေတာလား။
ကျွန်မ။
ကျွန်မ။        ။

……………………………………………………………………………………………………………………

ကဗျာဆရာလွန်းဆက်နိုးမြတ်က ကဗျာတစ်ပုဒ်လုံးကို အလွန်ရိုးရှင်းတဲ့အရေးအသားနဲ့တည်ဆောက်ထားတယ်။ နိမိတ်ပုံအသုံးပြုမှု၊ ဆာရီယယ်အရိပ်အငွေ့နဲ့ မစ်သ် သို့မဟုတ် ဒဏ္ဍာရီဆန်တဲ့ရေးဖွဲ့မှုတွေလုံးလုံးမပါဝင်ဘဲ ဘန်းစကားဆန်၊ အရပ်သားဆန်တဲ့ဝေါဟာရ (ဥပမာ အပြာကားကြည့်၊ လိုင်းကားစီး)တို့ကို အသုံးပြုထားတာ တွေ့ရတယ်။ ခေတ်ပြိုင်ကဗျာတော်တော်များများလို ဆန့်ကျင်ဘက်တွဲလုံးတွေနဲ့အထက်အောက်/ရှေ့နောက် ချိတ်ဆက်မှု၊ စကားလုံးအထားအသို ပြောင်းလဲချိတ်ဆက်မှု၊ ဆက်စပ်မှုမဲ့တဲ့တွဲယူချိတ်ဆက်မှုတို့ကိုလည်း တသီးတသန့် ဖော်ထုတ်ပြစရာ မပါခဲ့ဘူး။ ကဗျာတစ်ပုဒ်လုံးက ဟိုက်ပိုတက်တစ်လမ်းကြောင်းအားဖြင့်တသမတ်တည်းသွားတယ်။ ကဗျာ မဟုတ်ဘဲ ကဗျာဆန်တဲ့စကားပြေအရေးအသားလို့ ရည်ညွှန်းရင်လည်း ကဗျာဆရာအနေနဲ့ငြင်းပယ်လိမ့်မယ်မထင်ဘူး။ ဒီအရေးအသားမှာ ကဗျာနဲ့စကားပြေကြားက စည်းဟာ ပိုမိုမှုန်ဝါးနေတယ်။ကဗျာဖတ်သူအတွက် ဖတ်ရလွယ်ကူစေတယ်၊ နားလည်ဖို့ လွယ်ကူစေတယ်။ ကဗျာဖတ်ကျင့်မရှိသူတောင်မှအလွယ်တကူဖတ်ရှုနိုင်တယ်။ (အခုနောက်ပိုင်း ရိုးရှင်းတဲ့စကားပြေရေးဟန်ဘက်ကို နွယ်လာတဲ့အထဲမှာမောင်ယုပိုင်နဲ့ ဟံလင်းတို့ရဲ့ ကဗျာတစ်ချို့ကိုလည်း သတိပြုမိတယ်)

ဒီလိုဖတ်ရနားလည်လွယ်တဲ့ကဗျာတစ်ပုဒ်ကို ဘာကြောင့် လေ့လာချဉ်းကပ်တဲ့ဆောင်းပါးပုံစံရေးချင်ရသလဲလို့ မေးကောင်းမေးမယ်။ ရိုးရှင်းတဲ့ဝါကျတွေကို အနက်ပြန်ပြနေတာမဟုတ်ဘူးလားလို့စောဒကတက်စရာလည်း ရှိကောင်းရှိမယ်။ သို့သော် မောင်ချာလီတစ်ခါရေးခဲ့ဖူးသလို ခက်ခဲတဲ့ကဗျာကိုဝေဖန်ဖို့ခက်ခဲသလောက် လူအများနားလည်လွယ်တဲ့ကဗျာတစ်ပုဒ်ကို ချဉ်းကပ်ရတာလည်း အတိုင်းအတာတစ်ခုအားဖြင့်ဖိအားများတာပါပဲ။ အားလုံးက လွယ်လွယ်ကူကူဖတ်နေနိုင်တဲ့အခါ ဒါကိုထပ်ဆင့်ချဉ်းကပ်ပြဖို့ဘယ်လောက်အထိ ချဲ့ထွင်ထည့်ဝင်နိုင်မလဲဆိုတဲ့ စိန်ခေါ်မှုရှိလာတယ်။ ဘာပဲဖြစ်ဖြစ် ကျွန်တော့်အမြင်ကတော့“လာပါပြီ ဗမာပြည်လူမှုလိင်တစ်ပုဒ်”ထဲက ၀ါကျတွေသည် ရေခဲကျောက်ဆောင်ကြီးတစ်ခုရဲ့ ထိပ်ဖျားပိုင်းစာမျှသာရှိတယ်၊ကဗျာရဲ့အောက်ခြေကိုငုံ့ကြည့်လိုက်တဲ့အခါ အဆပေါင်းများစွာ ကြီးမားကျယ်ပြောနေတဲ့ အခြားအစိတ်အပိုင်းများကိုတွေ့ရဦးမှာ။ ကဗျာက မိန်းကလေးတစ်ယောက်ရဲ့ လူ့အဖွဲ့အစည်းအတွင်းက စံသွေမှုပြဿနာတစ်ခုကိုရိုးရိုးရှင်းရှင်းပြောပြသွားတယ်။ သို့သော် ကဗျာဆရာဟာ အစိတ်အပိုင်းတစ်ခုစာမျှ ဖော်ပြသွားပြီးနောက်ကျန်ရှိတာတွေကို ကျွန်တော်တို့ဆက်တွေးစေချင်တာ။ ကျွန်တော်တို့မြင်တတ်ရင် မြင်တတ်သလောက်ကြည့်ဖို့ချန်ခဲ့တာ။ ကဗျာဆရာကိုင်တွယ်ခဲ့တာက သာမန်ပေါ့ပြက်သေးငယ်တဲ့ ပြဿနာတစ်ရပ်မဟုတ်ဘူး။ လူ့အဖွဲ့အစည်းတစ်ခုလုံးနဲ့စပ်ဆိုင်တဲ့လှုမှုစံနှုန်း၊ အစဉ်အလာအလေ့၊ သိမှုဆိုင်ရာအကြပ်အတည်း၊ ဖိနှိပ်ကန့်သတ်ချက်၊ ပါဝါနဲ့လွှမ်းမိုးကြီးစိုးဆဲစံတို့ရဲ့အလုပ်လုပ်ပုံတို့ ပါဝင်နေတယ်။

ကျွန်တော်တို့က ၀ါကျတစ်ကြောင်းကိုဖတ်ပြီး အဲဒီဝါကျအတိုင်းအနက်ပြန်ရုံနဲ့ မလုံလောက်တော့ဘူး။ ဥပမာအားဖြင့် ကဗျာဆရာက (ကျွန်မဟာ "စံ"လွဲနေတယ်) လို့ ရေးခဲ့တယ်။ ဒါကိုဖတ်ပြီးကဗျာထဲက ကျွန်မဟာ သူ့ပတ်ဝန်းကျင်လူ့အဖွဲ့အစည်းက သတ်မှတ်ပေးထားတဲ့ လူမှုစံနှုန်းတွေ၊ အစဉ်အလာအလေ့တွေဆီကနေသွေဖီနေတယ်လို့ အကြမ်းဖျဉ်းဆပွားနားလည်နိုင်တယ်။ သို့သော် ဒီအဆင့်မှာရပ်တန့်ထားရုံနဲ့လည်းမလုံလောက်ဘူး။ ကျွန်တော်တို့က စံသွေခြင်းအကြောင်း ဖတ်ရှုနေရင်း အဆိုပါစံသွေမှုကို တိုင်းတာသတ်မှတ်ပေးလိုက်တဲ့မူရင်း “စံ” အထိ တိုးဝင်ကြည့်ဖို့လိုလာတယ်။ ကျွန်မကို သွေဖီမှုဖြစ်စေတဲ့ မူရင်းစံက ဘာလဲ။ဘာကြောင့် သွေဖီမှုဖြစ်ခဲ့ရသလဲ စတာတွေကို ဆက်လက်တွေးတော့ရတော့မှာ။ (ကျွန်မဟာ "စံ"လွဲနေတယ်) လို့ပဲ အတိအကျအတိုင်းဖတ်ရှုနားလည်လိုက်ရင်  အဲဒီအခိုက်အတန့်မှာ လွှမ်းမိုးကြီးစိုးဆဲစံတွေရဲ့အထက်အောက်ဖိနှိပ်အလုပ်လုပ်ပုံက ကျွန်မသာမက ကဗျာဖတ်သူအပေါ်မှာပါ ထပ်ဆင့်လွှမ်းမိုးသွားတော့မှာ။ကျွန်တော်တို့ရင်းနှီးကျွမ်းဝင်တဲ့ လူမှုအလေ့အကျင့်အားဖြင့်လည်း အဆိုပါအတိုင်း လွှမ်းမိုးခံရဖို့အားသာချက်ရှိနေပြီးသားဖြစ်တယ်။ ဒီနေရာမှာ စံ (Norm) နဲ့ စံသွေခြင်း(Deviance from Norm) တစ်ခုချင်းစီအလိုက် သီးခြားချဉ်းကပ်ဖို့လိုလာတယ်။

စံလွဲခြင်း၊ စံသွေခြင်းလို့ ဆိုလိုက်တဲ့အခါ အဆိုပါသွေဖီမှုရဲ့အရှေ့မှာမူရင်း “စံ” တစ်ခုခုအရင်ရှိနှင့်ပြီးသားဖြစ်တယ်။ စံနှုန်းသတ်မှတ်ချက်တွေဟာ လူ့အဖွဲ့အစည်းတစ်ခုရဲ့လူမှုထိန်းချုပ်ရေးအသွင်(SocialControl) တစ်ခုအဖြစ် အလုပ်လုပ်ပြီး အဆိုပါအဖွဲ့အစည်းအတွင်းက လူသားတစ်ယောက်ချင်းစီဆီကနေအများနောက်လိုက်ပါတဲ့ ညီညွှတ်ကိုက်ညီမှု (Conformity) ကို တောင်းဆိုတယ်။ သွေဖီသူတွေ(The Deviants) ရှိလာတဲ့အခါမှာလည်း စံနှုန်းတစ်ခုအောက် စုစည်းညီညွတ်တဲ့အစုအပေါင်းကနေအဆိုပါကွဲထွက်သွေဖီသူတွေကို (ကဗျာထဲက “ကျွန်မ” ကြုံတွေ့ခဲ့ရသလိုမျိုး) အပြစ်ပေးဒဏ်ခတ်ခြင်းနဲ့တုံ့ပြန်မှာဖြစ်တယ်။ သို့သော် တစ်ဖက်မှာက စံနှုန်းတိုင်းက အကြွင်းမဲ့မှန်ကန်မှုသဘောဆောင်နေတာမျိုးမဟုတ်ဘူး။ သိပ္ပံနည်းကျမဟုတ်တဲ့ စံနှုန်းသတ်မှတ်ချက်တွေ၊ ကျိုးကြောင်းဆီလျော်မှုမရှိတဲ့ရှေးရိုးစွဲအစဉ်အလာစံနှုန်းတွေက အချိန်နဲ့အမျှ ပြိုကျပျက်စီးနေတာဖြစ်တယ်။ အမေရိကန်သီချင်းရေးဆရာဖရန့်ခ်ဇပ်ပါရဲ့ ထင်ရှားတဲ့ကောက်နှုတ်ချက်တစ်ခုဖြစ်တဲ့ “စံနှုန်းတစ်ခုဆီကနေ သွေဖီမှုမရှိရင်တိုးတက်ပြောင်းလဲမှုလည်း မဖြစ်ပေါ်နိုင်ဘူး” ဆိုတဲ့စကားအတိုင်း အချို့သောအခြေအနေများအောက်မှာသွေဖီခြင်းက ပိုမိုကောင်းမွန်တဲ့အပြောင်းအလဲဆီ ဦးတည်တာမျိုးလည်း ဖြစ်နိုင်တယ်။

ကဗျာထဲမှာ ကျွန်မဟာ စံလွဲနေသူ၊ လူ့အဖွဲ့အစည်းနဲ့ လိုက်လျောညီထွေမရှိသူ၊ပတ်ဝန်းကျင်က ၀ိုင်းပယ်ခံထားရတဲ့ လိင်ပိုင်းဆိုင်ရာမူမမှန်သူဖြစ်တယ်။ ကျွန်မဟာ ဘေးဖယ်ထုတ်ခံထားရသူဖြစ်တယ်။ကျွန်မဟာ The Other ဖြစ်တယ်။ ဒါကြောင့် ကဗျာက ကျွန်မရဲ့စိတ်ပိုင်းဆိုင်ရာအကြပ်အတည်းဆိုက်မှုကိုဖော်ထားပြထားတယ်လို့ယူနိုင်ပေမယ့် တစ်ဖက်မှာလည်း အဆိုပါဖြစ်ရပ်ဟာ ကျွန်မကိုတံဆိပ်ကပ်ဖယ်ထုတ်ဖို့ကြိုးစားနေတဲ့လူ့အဖွဲ့အစည်းတစ်ခုလုံးရဲ့ အစဉ်အလာ သတ်မှတ်ချက်ပိုင်းဆိုင်ရာ အကြပ်အတည်းဆိုက်မှုပါဝင်နေတယ်။ကဗျာတစ်ပုဒ်လုံးကို ခြုံငုံလိုက်တဲ့အခါ ကျွန်မနဲ့ ကျွန်မရဲ့ဘေးဖယ်ထုတ်ခြင်းခံရမူဖြစ်စဉ်တို့ကနေတစ်ဆင့် နောက်ကွယ်က လူ့အဖွဲ့အစည်းအတွင်း စံနှုန်းတွေလည်ပတ် အလုပ်လုပ်ခြင်း၊ လိင်အရမညီမျှတဲ့ကန့်သတ်ခွဲခြားမှုရှိခြင်းနဲ့ လူသားတွေရဲ့ စိတ်ပိုင်းဆိုင်ရာ တွေးခေါ်ချင့်ချိန်နိုင်စွမ်းအပေါ် လွှမ်းမိုးကြီးစိုးဆဲလူမှုစံနှုန်းတွေ ဖိနှိပ်လွှမ်းမုိုးမှုပြုခြင်းတို့ကိုလေ့လာတူးဆွနိုင်မှာဖြစ်တယ်။

သို့တည်းမဟုတ် ကျွန်တော်တင်ပြခဲ့တဲ့အကြောင်းအရာတွေနဲ့ အလွန်ခြားနားတဲ့အခြားသောရှုထောင့်တွေဆီကနေဒီကဗျာအပေါ် ချဉ်းကပ်မှုပြုမယ်ဆိုရင်လည်း အလွန်ဖြစ်နိုင်ချေရှိနေတာပါ။ ချဉ်းကပ်သူအနေနဲ့ကျွန်တော်က ဒီကဗျာ ဘာကိုဆိုလိုတယ် ပြောခွင့်မရှိဘဲ ဒီကဗျာဆိုလိုတာကို “ကျွန်တော်ဘယ်လိုမြင်သလဲ”ဆိုတဲ့ခေါင်းစဉ်အောက်ကသာ လေ့လာဝေဖန်ခဲ့ခြင်းဖြစ်ပါကြောင်း။        ။


                                                                                                                 --- တည်တံ့ (G.B.K)---
                                                                                                                       ၁၇ ဧပြီ ၂၀၁၃