ဒီလိုပါပဲ နာဒီယာ၊ တစ်ခါတစ်ခါ ဘ၀ဟာ အသားမပါဆားမပါ တည်တံ့ (G.B.K)

ဒီလိုပါပဲ နာဒီယာ .. ။
မှတ်တမ်းမှတ်ရာတစ်ချို့ ကျန်ကောင်းကျန်ဦးမှာပေါ့။ ခေါင်းထဲမှာတော့ တဆစ်ဆစ်နဲ့ နာကျင်ကိုက်ခဲလို့။  ဖန်ခွက်ထိခတ်သံတွေ၊ ဂီတသံတွေ၊ တီးတိုးစကားသံတွေ၊ အရေပြားချင်း ထိတွေ့ဆော့ကစားသံတွေနဲ့ မနေ့ညကအကြောင်းတွေ မပြောကြနဲ့စို့လား။ နီထွေးလှပတဲ့မင်းရဲ့နှုတ်ခမ်းနှစ်လွှာပေါ်မှာ လက်ညှိုးတစ်ချောင်း ကန့်လန့်ဖြတ်တင်လို့ အမူအရာနဲ့တားချင်တားမယ်။ မျက်လုံးတစ်ဖက် မှိတ်ပြချင်ပြမယ်။ ပူနွေးဆဲအတိတ်တွေကို အအေးခန်းထဲ ထိုးသိပ်ထည့်လိုက်ပြီး ဆလိုက်မီးရောင်ကို လက်ရှိကာလအပိုင်းအခြားတစ်ခုပေါ် ရွှေ့ပြောင်းလိုက်တယ်။ မနက်နိုးလာချိန်တုန်းက တစ်ထောင်တန်ဘယ်နှစ်ရွက် မင်းရဲ့လက်ကိုင်အိတ်ထဲမှာ ရှာတွေ့ခဲ့သလဲ။ သုံးရွက်လား လေးရွက်လား။ ဒီလိုပါပဲ နာဒီယာ၊ လူကြီးမင်းဟာ ထုံးစံအတိုင်း အိပ်ယာထနောက်ကျနေတယ်။
ရေချိုးခန်းထဲက မင်းပြန်ထွက်လာချိန်အထိ၊ တစ်ညလုံးမေ့လျော့နေခဲ့တဲ့ ကေဘဲလ်တီဗီကို
ခလုပ်နှိပ်ပိတ်လိုက်ချိန်အထိ၊ ဘာကာဒီသံပုရာအခွံလွတ်တစ်လုံးကို မတော်တဆ တိုက်မိလိုက်ချိန်အထိ၊ လိုက်ကာအဖွင့်မှာ အငမ်းမရတိုးဝင်လာတဲ့ နေရောင်ခြည်ရဲ့ ထိတွေ့နှုတ်ဆက်မှုကိုခံလိုက်ရချိန်အထိ၊ ဟမ်းဖုန်းရဲ့ သီချင်းတီးလုံးသံသဲ့သဲ့ တစစ ဆူညံကျယ်လောင်လာချိန်အထိ၊ နောက်ပြီး ခပ်ဖွဖွ မလှုပ်နှိုးမီအချိန်အထိ သူဟာ ထလာဦးမှာမဟုတ်ဘူး။
စိတ်ရှည်ရှည်ထားပါ နာဒီယာ။ အိုးတစ်လုံးနဲ့အချဉ်ဖောက်ခြင်းအနုပညာမှာ စိတ်ရှည်ဖို့ အများကြီးလိုအပ်တယ်။ ဂျင်ဆီလွန်ရှော့ပင်းမောလ်ရဲ့ တဖျတ်ဖျတ်လက်ခြင်းတွေ တောက်ပခြင်းတွေ မင်းအတွက်ဖြစ်မလာဘူးလို့ ဘယ်သူပြောမလဲ။ သူ့လက်မောင်းကို ခိုတွဲပြီး လက်ညှိုးညွှန်လိုက်ရာ ရေဖြစ်မလာပေမယ့် ရွှေဖြစ်လာရင်လည်း မင်းအတွက်အမြတ်ပဲ မဟုတ်လား။

ဒီလိုပါပဲ နာဒီယာ။
ဒီနေ့ည မင်းဘယ်မှာရှိမလဲ။ ဟောလီးဝုဒ်မှာလား၊ တိုက်ဂါးဒစ္စကိုမှာလား၊ ဒါမှမဟုတ် ခပ်သေးသေး ဘားတစ်ခုမှာလား။
လိပ်ပြာတစ်ကောင်လိုပျံဝဲနေတဲ့မင်းကို လိုက်ရှာသူတစ်ချို့ ရှိကောင်းရှိမယ်။ ဒါပေမယ့် ဂျက်ခ်ပေါ့သေတ္တာရဲ့ JAC_POT စာလုံးတန်းမှာ နောက်ဆုံးအံစာခေါက်သံတစ်ချက်နဲ့ အက္ခရာ K ပေါ်ထွက်လာနိုင်ရင်တောင် မင်းကိုတော့ တွေ့ဖို့အခွင့်အရေး ရလိမ့်မယ်မထင်ဘူး၊ မင်းသာ မတွေ့စေချင်ဘူးဆိုရင်ပေါ့။ ဒါမှမဟုတ် မင်းရဲ့ဒီနေ့ညအစီအစဉ်မှာ သူတို့ပါဝင်ဖို့ အလှည့်မကျသေးဘူးဆိုရင်ပေါ့။ အနည်းငယ်ကံကောင်းသူတွေက မတ်ဆေ့ခ်ျတစ်စောင်စီရကြတယ် “ဒီနေ့ည ကျွန်မ နေမကောင်းလို့ အလုပ်ဆင်းမှာမဟုတ်ဘူး တီလာ့ခ်” .. ။ တကယ်တော့ အခြားရင်ခွင်တစ်ခုဆီ ယာယီရွှေ့ပြောင်းထားတဲ့ မင်းရဲ့အလုပ်အကြောင်းသိသူဟာ မင်းကလွဲရင် တခြားတစ်ယောက်။ မင်းရဲ့နံဘေးက ကနေဒီယန်အမျိုးသားဟာ သိပ်ကိုကြင်နာတယ်လို့မင်းထင်တယ်။
“အိုးမိုင်ဂေါဒ့် ဒီဆွဲကြိုးဟာ တကယ်ပဲကျွန်မအတွက်လား ဒါလင်” .. ။
သူဟာ မင်းအတွက် ဘားမှာပေးချေရမယ့် Bar Fine ဘတ်တစ်ထောင်ကို အစစ်အဆေးမရှိ၊ အဆစ်ဈေးမရှိ။
သူဟာ မင်းအမြတ်တနိုး ကိုင်တွယ်ထိတွေ့ကြည့်မိတဲ့ အရာဝတ္ထုတွေကိုဝယ်ယူဖို့ စက္ကူချပ်တွေအဆင်သင့်ရှိတယ်၊
သူဟာ မင်းပြောပြတဲ့ အမေ့အိမ်ကကျွဲကြီးဖျားနာသေတဲ့ပုံပြင်အကြောင်း အဟုတ်မှတ်နားထောင်ပေးတယ် (ခေါင်းတညိတ်ညိတ်နဲ့ ကရုဏာတွေသက်လို့)၊ သူဟာ နောက်ခြောက်လအတွင်း မင်းကိုထပ်လာတွေ့ဖို့အတွက် အလေးအနက်ကတိပြုတယ်။
ဘယ်သူပြောနိုင်မလဲ၊ အဲဒီအချိန်မင်းဟာ နောက်ထပ်နေရာသစ်တစ်ခု ပြောင်းရွှေ့ပြီးဖြစ်ချင်ဖြစ်နေမှာ။
မင်းဟာ လိပ်ပြာတစ်ကောင်မဟုတ်လား နာဒီယာ။

ဒီလိုပါပဲ နာဒီယာ။
ကဗျာတစ်ပုဒ်မှာဖတ်ရတယ်။ “ကျန်းမာရေးအရ သွေးသားဖြေဖျောက်ရတယ်” ဆိုတာ။ အခြားလိုအပ်ချက်တစ်ခုခုကြောင့်ရော သွေးသားဖြေဖျောက်ခွင့်မရှိဘူးလား။ ဥပမာ ကျွန်မကြိုက်နှစ်သက်လို့ဆိုတာပဲဖြစ်ဖြစ်။ ဥပမာ Relationship တစ်ခုယာယီတည်ဆောက်ဖို့ လိုအပ်ချက်တစ်ရပ်အနေနဲ့ဖြစ်ဖြစ်။ ဥပမာ တစ်ည၀င်ငွေ ဘတ်သုံးထောင်ရှာဖွေနိုင်ဖို့ တစ်ခုတည်းသောနည်းလမ်းအနေနဲ့ ဆိုတာပဲဖြစ်ဖြစ်။ မုသားရောင်တလက်လက်တောက်နေတဲ့ နှုတ်ခမ်းတွေက တစ်ခါတရံ ကလေးတစ်ယောက်လို ဟန်မဆောင်တတ်ဘူး။ မင်းက နေလောင်ဒဏ်ကိုကြောက်တယ်၊ လက်ဖ၀ါးတွေ ကြမ်းတမ်းမှာကြောက်တယ်၊ မျက်လုံးတစ်ချို့ရဲ့ထိုးနှက်လိုရင်းအကြည့်တွေကိုတော့ မကြောက်ပြန်ဘူး။ မင်းက မကျက်တကျက်သိုးသားကင်ကို နှစ်သက်တယ်။ မာဂရီတာကော့တေးကို နှစ်သက်တယ်၊ ရှေးရိုးစွဲလူ့အဖွဲ့အစည်းကနေ ကွဲထွက်ဖို့ကိုတော့ မနှစ်သက်ပြန်ဘူး။ မင်းက တစ်နှစ်မှာနှစ်ခါ အိမ်မပြန်ရမှာ စိုးရိမ်တယ်။ မိသားစုကို မထောက်ပံ့နိုင်မှာ စိုးရိမ်တယ်၊ အန္တရာယ်တွေနဲ့ အလဲအထပ်ပြုဆော့ကစားရမှာတော့ မစိုးရိမ်ပြန်ဘူး။ မင်းက နှုတ်ခမ်းအစုံစုံကို ဖိကပ်ထိရှိုက်လိုက်ဖို့ ၀န်မလေးသူ၊ မင်းက တက်ကျမ်းတစ်အုပ်တလေကို ကောက်လှန်ကြည့်စရာလို့တောင် သတိမရသူ၊ မင်းက စာမျက်နှာတွေပေါ်က ဘ၀အကြောင်း စိတ်ကူးယဉ်သရုပ်ဖော်မှုတွေကိုသိရင် အားရပါးရရယ်မောမယ့်သူ၊ မင်းက အချစ်နဲ့ဘ၀ဟာ ကွဲပြားကြောင်း ပြက်ပြက်ထင်ထင် စွဲမှတ်ထားသူ၊ မင်းက အခက်ခဲဆုံး ဂဲသြမေတြီပုစ္ဆာတစ်ပုဒ်လိုမျိုး အပြောကျယ်တဲ့ပင်လယ်ပြာလိုမျိုး နားလည်ဖို့ နက်ရှိုင်းသူ။ တစ်ခါတစ်ခါ မင်းဘာသာရှာမတွေ့နိုင်လို့ ချုံးမဲချငိုခဲ့ရတယ်မဟုတ်လား နာဒီယာ။

ဒီလိုပါပဲ နာဒီယာ။
ဒီဗူဗွားက မင်းအကြောင်းတွေမသိခဲ့ဘူး။ Second Sex အယူအဆအရ မင်းဟာ တံဆိပ်ကပ်မွေးဖွားလာသူမဟုတ်၊ ပြုပြင်ပုံသွင်းပြီး တံဆိပ်ကပ်ခံခဲ့ရသူသာဖြစ်တယ်ဆိုရင် ဘာပြောမလဲ။ Feminine Mystique ကို အခါအားလျော်စွာ ဖတ်ခွင့်ရခဲ့ရင်၊ သို့မဟုတ် ဘက်တီဖရီဒန်းကိုယ်တိုင်က ရှင်းပြလာခဲ့ရင်ရော။
မသက်ဆိုင်တဲ့အကြောင်းအရာတစ်ခုလို ခပ်ပေါ့ပေါ့ရယ်သွမ်းသွေးပစ်မှာလား။ ၀ိုင်းစက်တဲ့အညိုရောင်မျက်လုံးတွေနဲ့ တအံ့တသြငြိမ်သက်နားထောင်နေမှာလား။ မင်းဟာ ဖယ်ထုတ်ခံတွေရဲ့ သီးသန့်ဖယ်ထုတ်ခံဖြစ်တဲ့အကြောင်း သဘောပေါက်ရင်း ၀မ်းပမ်းတနည်း ရှိုက်ငင်ငိုကြွေးလိုက်မှာလား။ ကျွန်မမှာ အချိန်မှမရှိတာပဲလို့ မင်းပြောမယ်။ လိပ်ပြာတစ်ကောင်လို ၀ိဥာဉ်တစ်ကောင်လို ခေါက်ပြန်ပြေးလွှားရင်း ပျံဝဲနေရတယ်၊ ဘန်ကောက်မှာ၊ ချင်းမိုင်မှာ၊ ဖူးကတ်မှာ၊ ဖြူလွလွသဲသောင်မှာ၊ ဘန်ဂလာလမ်းမမှာ၊ ခပ်ကျဉ်းကျဉ်း Soi တွေကြားမှာ၊ စပေါ့မီးရောင်အောက်မှာ၊ တစ်ခါတစ်ခါ လူတစ်ယောက်ရဲ့ ရင်ထဲမှာ။ ဒီလိုပါပဲ နာဒီယာ၊ အညိုရောင်ခမ်းနားခြင်းတွေ လွန့်လူးတောက်ပနေဆဲပါ။ အနောက်အရပ်ကိုပျံသန်းမယ့် တစ်လမ်းသွားလေယာဉ်လက်မှတ်လား၊ လစဉ်စပွန်ဆာချက်လက်မှတ် ဘတ်တစ်သောင်းရဖို့လား၊ တစိမ်းတစ်ဦးဆီမှာ ၀ကွက်အပ်လိုက်ရမယ့် ဘ၀အာမခံချက်အတွက်လား။ ကျွန်မမှာ အချိန်မှမရှိတာပဲလို့ မင်းပြောမယ်။ စိတ်ကူးယဉ်ကြီးမြင့်မှုကို လေနဲ့ဆောက်ကြတယ်၊ ငွေနဲ့ဆောက်ပြတယ်၊ ကျွန်မမှာ ဒါပဲရှိတော့ ဒါနဲ့ဆောက်ရတယ်။ အပျက်မ နာဒီယာဟာ သူ့အိပ်မက်နန်းတော်ကို တစ်လက်မမှ အကျူးကျော်မခံနိုင်ဘူး။

ဒီလိုပါပဲ နာဒီယာ။
တစ်ခါတစ်ခါ ဘ၀ဟာ အသားမပါ ဆားမပါဘူး။ တစ်ခဏတာအတွက် ကိုယ်ပိုင်အရသာနည်းနည်းဖြည့်စွက်ရင်း
ကိုယ်တိုင်အမွှေးအကြိုင်တွေ ဖော်ထုတ်ခပ်ထည့်ရင်း လက်လွန်သွားတဲ့အခါ ရှိကောင်းရှိဦးမှာပေါ့။
ကျန်းမာရေးအတွက် အလေးအပင်လျှော့ပေါ့ဖို့ သတိပေးစာတန်းတွေရော အလုပ်ဖြစ်ကြရဲ့လား။
အကောင်းအဆိုး အမှားအမှန်ဆိုတာမျိုးက ကိုယ်တိုင်ဖြတ်သန်းမှုနဲ့ကြုံတွေ့ပြီးမှ ပုံဖော်ထုဆစ်ရင်း ထွက်ကျလာတဲ့ ရလာဒ်ပါ။
မင်းရဲ့အဓိပ္ပါယ်ဖွင့်ဆိုမှုဟာ မင်းအတွက်သာရှိပါစေ နာဒီယာ။

ဒီလိုပါပဲ နာဒီယာ။
ဘ၀ဆိုတာတိုက်ပွဲဆိုတဲ့စကားထက် လေးနက်မယ့်ဒဿနမျိုး လူတွေ ဖော်ထုတ်ဖို့မကြိုးစားတော့ချိန်ကစလို့ မင်းလည်းလှောင်ပြောင်သံနဲ့ ရယ်မောတတ်နေပြီ ကြားတယ်။ တိုက်ခိုက်စရာမလိုပါဘဲ အလိုအလျောက်အောင်ပွဲရနေသူတွေ၊ တရားမျှမျှတတ ယှဉ်ပြိုင်ခွင့်မရဘဲ သေနတ်တစ်ချက်မဖောက်လိုက်နိုင်မီ အလိုအလျောက်ရှုံးနိမ့်ရသူတွေ။
ဒါဟာ ဘ၀လားလို့ မင်းကမေးမယ်။
ဘ၀ဆိုတာ တိုက်ပွဲလို့ ကိုယ့်ဘာသာအမည်တပ်ထားတဲ့ ဟုတ်ယောင်ဝါးဝါးတွေပါ နာဒီယာ။ နံဘေးကလူတွေကိုကြည့်ရင်း မျက်စိစုံမှိတ်တိုက်ခိုက်နေကြသူတွေ အများစုပါ။ ဘာအတွက်တိုက်ခိုက်နေကြသလဲ ကိုယ့်ဘာသာမေးကြည့်ကြဖို့ကောင်းတယ်။ တိုက်ပွဲလား Suicide Mission တစ်ခုလား ကွဲကွဲပြားပြားသိနိုင်ဖို့ပေါ့။ မင်းဆီမှာတော့ ဒီမေးခွန်းအတွက် လေးနက်တဲ့အဖြေတစ်ခုခုရှိနေနိုင်ဖို့ မျှော်လင့်တယ်။

ဒါမှမဟုတ် ..
“Let Our Desires be Our Only Laws”
(ငါတို့၏ ဆန္ဒများသည်သာ ဥပဒေသများအဖြစ် တည်ရှိပါစေ)
မင်းဆီက ဒီဆတ်ရဲ့စကားနဲ့ သဘောသက်ရောက်ပုံဆင်တဲ့အဖြေတစ်ခုခု ပေးလာမယ်ဆိုလည်း အံ့သြစရာဖြစ်လိမ့်မယ် မထင်ဘူး

ဒီလိုပါပဲ နာဒီယာ ..
မင်းလဲသိတဲ့အတိုင်း
တစ်ခါတစ်ခါ ဘ၀ဆိုတာ အသားမပါ ဆားမပါဘဲ အရသာရှိဟန်ဆောင်ရတာမျိုးမဟုတ်လား ။      ။


                                                                                   --- တည်တံ့ (G.B.K) ---
                                                                                      ၁၈ နိုဝင်ဘာ ၂၀၁၂
CTRL + Q to Enable/Disable GoPhoto.it