“အားကစားနဲ့ နိုင်ငံတည်ဆောက်ရေး”

The voice သတင်းစာ

မှူးသစ်

အားကစားနဲ့ နိုင်ငံတည်ဆောက်ရေးဆိုတာ အပေါ်ယံအားဖြင့်ကြည့်မယ်ဆိုရင် ဆက်စပ်မှုနည်းပါတယ်။ မြန်မာနိုင်ငံလို မတူကွဲပြားမှုနဲ့ ယဉ်ကျေးမှုပေါင်းစုံတည်ရှိနေတဲ့ နိုင်ငံမှာ စုစည်းညီညွတ်မှုဆိုတာ နိုင်ငံတည်ဆောက်ရေးအတွက် အရေးပါတဲ့ အခန်းကဏ္ဍတစ်ခုအနေနဲ့ ရှိနေပါတယ်။ မတူကွဲပြားမှုတွေကြားမှာ ယုံကြည်မှုပျောက်ဆုံးတာတွေ၊ ပဋိပက္ခတွေနဲ့ အပြန်အလှန်နားလည်မှု နည်းပါးတာတွေ ရှိနေရင် နိုင်ငံတည်ဆောက်ရေးကို သွားဖို့ လွယ်ကူနိုင်မှာ မဟုတ်ပါဘူး။

နိုင်ငံတည်ဆောက်ရေးလို့ ပြောတဲ့အခါ ပညာရပ်ဆိုင်ချဉ်းကပ်မှုတွေအရ တိုင်းပြည်ရဲ့ စီးပွားရေးကို တည်ဆောက်တာ၊ စံနူန်းတွေနဲ့ နိုင်ငံရေးစနစ်ကိုတည်ဆောက်တာ စသည်ဖြင့် ချဉ်းကပ်လေ့ရှိကြပါတယ်။ မြန်မာနိုင်ငံရဲ့ နိုင်ငံတည်ဆောက်ရေးလို့ ပြောတဲ့အခါ နိုင်ငံရေး၊စီးပွားရေး သာမကဘဲ လက်နက်ကိုင်ပဋိပက္ခတွေအတွင်းက ငြိမ်းချမ်းရေးကို တည်ဆောက်ရတာ၊ မတူကွဲပြားမှုကြားက ဘုံရည်မှန်းချက်နဲ့ တူညီတဲ့တန်ဖိုးစံနူန်းတွေကို တည်ဆောက်ရတာ စသည်ဖြင့်ရှိကြပါတယ်။ 

လက်ရှိ နိုင်ငံရဲ့ ခေါင်းဆောင်ဖြစ်တဲ့ နိုင်ငံတော်အတိုင်ပင်ခံ ဒေါ်အောင်ဆန်းစုကြည်အနေနဲ့ကတော့ 

NLD ပါတီရဲ့ ဦးစားပေးရည်မှန်းချက်နဲ့ လုပ်ငန်းစဉ်ဟာ ပြည်တွင်းငြိမ်းချမ်းရေးရရှိရေးဖြစ်တယ်လို့ ပြောဆိုဖူးပါတယ်။ ဆိုရရင်တော့ ငြိမ်းချမ်းရေးတည်ဆောက်ပြီး ကျန်တဲ့ ကဏ္ဍတွေဖြစ်တဲ့ နိုင်ငံရေး စီးပွားရေး ဖွံ့ဖြိုးတိုးတက်ရေးတွေကို တပါတည်းလုပ်ဆောင်သွားဖို့ဆိုတာ နားလည်နိုင်ပါတယ်။ 

ငြိမ်းချမ်းရေးလို့ ပြောတဲ့အခါ လက်နက်ကိုင်ထားတဲ့ကြတဲ့ အဖွဲ့အစည်းတွေကြားထဲက ငြိမ်းချမ်းရေးဖော်ဆောင်မှုဆိုတာ ရှိသလိုပဲ လက်နက်မကိုင်ထားတဲ့ ပြည်သူတွေရဲ့ 

အခန်းကဏ္ဍ မတူကွဲပြားတဲ့ လူ့အဖွဲ့အစည်းအတွင်းက သဟဇာတဖြစ်မှုတွေကိုပါ ထည့်သွင်းစဉ်းစားဖို့လိုပါတယ်။ လက်နက်ကိုင်တိုက်ပွဲတွေဟာ နှစ်ဖက် အဖွဲ့အစည်းကြား 

စားပွဲဝိုင်းပေါ်မှာ စေ့စပ်ဆွေးနွေးအဖြေရှာခြင်းနည်းလမ်းနဲ့ ဖြေရှင်းလို့ရနိုင်ပေမယ့် လူ့အဖွဲ့အစည်းအတွင်းက ပြဿနာတွေ ယုံကြည်နားလည်လက်ခံထားတဲ့အယူအဆတွေကတော့ ဖြေရှင်းဖို့ သိမ်မွေ့နက်နဲပါတယ်။

 နှစ်ပေါင်းများစွာ ရှည်ကြာခဲ့တဲ့ ပြည်တွင်းလက်နက်ကိုင်ပဋိပက္ခတွေကြောင့် ထိခိုက်နစ်နာခံစားခဲ့ရသူတွေရှိသလို တိုင်းရင်းသားတွေကြားထဲမှ လူမျိုးရေး ဘာသာရေး 

ယဉ်ကျေးမှု ဘာသစကး ဆိုင်ရာ မတူကွဲပြားမှုတွေပေါ်လိုက်ပြီး အပြန်အလှန်သဘောထားတွေဟာ သဟဇာတဖြစ်ဖို့ ခက်ခဲနေရဆဲပါပဲ။ စစ်အာဏာရှင်လက်ထက် ၀ါဒဖြန့်ချိမှုနဲ့ အခွင့်အရေးတွေ ခွဲခြားသက်မှတ်ခံခဲ့ရခြင်းတွေကလည်း မတူကွဲပြားမှုပေါင်းစုံတည်ရှိနေတဲ့ လူ့အဖွဲ့အစည်းအတွက်က သဟဇာတဖြစ်ရေး အကျိုးသက်ရောက်မှု များစွာရှိနေနိုင်ပါတယ်။ 

ဒီကနေ့ အချိန်ကတော့ ဒီမိုကရေစီ အသွင်ကူးပြောင်းမှု ခရီးမှာ လျောက်လှမ်းနေတဲ့ အချိန်ဖြစ်တာနဲ့ 

အညီ ပြည်တွင်းငြိမ်းချမ်းရေး၊ အမျိုးသားပြန်လည်ရင်ကြားစေ့ရေးတွေနဲ့အတူ နိုင်ငံတည်ဆောက်ရေးဆိုတဲ့ အရာတွေကို လုပ်ဆောင်နေရတဲ့ အချိန်တစ်ခုဖြစ်သလို အကျပ်အတည်းတွေ 

စိန်ခေါ်မှုတွေလည်း အများအပြားရှိနေပါတယ်။

နိုင်ငံတည်ဆောက်ရေးလို့ ဆိုလိုက်တဲ့အခါ နိုင်ငံအတွင်းမှာ ရှိတဲ့ နိုင်ငံသားအားလုံးရဲ့ ဘုံရည်မှန်းချက်တွေနဲ့ တူညီတဲ့ ခံယူမှု တန်းတူညီမျှတဲ့ အခွင့်အရေးရရှိမှုတွေကို 

စုစည်းနိုင်ဖို့ ညီညွတ်အောင် ဖန်တီးပုံဖေါ်နိုင်မှုက အရေးပါလာပါတယ်။ ဒီလို အခြေအနေမျိုးဖြစ်ပေါ်လာအောင် နိုင်ငံရေးအရ ဖန်တီးဖေါ်ဆောင်တာ၊ 

စီးပွားရေးအရ တည်ဆောက်တာတွေအပြင် စာပေ၊အနုပညာ၊ အရပ်ဘက်အဖွဲ့အစည်း ၊ 

အားကစား အဘက်ဘက်ကနေ ကဏ္ဍမျိုးစုံကနေ နိုင်ငံတည်ဆောက်ရေးသွားမှသာ

ဖြစ်နိုင်ချေရှိတဲ့ အခင်းအကျင်းတွေ ရရှိလာနိုင်မယ်ဆိုတာ သတိပြုဖို့လိုပါတယ်။ 

အထူးသဖြင့် လူ့အဖွဲ့အစည်းကို ပြောင်းလဲလိုက်ဖို့ တစ်နိုင်ငံလုံးမှာရှိတဲ့ နိုင်ငံသားတွေ

အားလုံးကြား တူညီတဲ့ ရည်မှန်းချက်နဲ့ တူညီတဲ့ ခံယူမှုတွေ ဖြစ်လာဖို့ဆိုတာ သိမ်မွေ့တဲ့ လုပ်ငန်းစဉ်တွေလိုအပ်ပါတယ်။ ဆိုလိုချင်တာကတော့ မတူကွဲပြားတဲ့ အမှတ်သရုပ်တွေ၊ 

ယဉ်ကျေးမှုတွေ ဘာသားစကားနဲ့ ကိုးကွယ်ယုံကြည်မှုတွေကို အသိအမှတ်ပြု 

တန်ဖိုးထားပြီး တို့အားလုံးမြန်မာဆိုတဲ့ စိတ်အတွင်းပိုင်း ခံယူချက်မျိုးဖြစ်တည်လာရေးပါပဲ။ 

ဒီဆောင်းပါးရဲ့ ခေါင်းစဉ်ကို ပြန်ကောက်ရမယ်ဆိုရင်တော့ အားကစားနည်းတွေကလည်း နိုင်ငံရေးတည်ဆောက်ရေး(အထက်မှာဆိုခဲ့တဲ့ နိုင်ငံသားကြားထဲ စုစည်းညီညွတ်တဲ့ 

ဘုံရည်မှန်းချက်၊ ဘုံခံယူချက်တွေဖြစ်တည်လာရေး) အတွက် အသုံးပြုနိုင်တဲ့ အရာတစ်ခုပါပဲ။ 

အထူးသဖြင့် အားကစားနည်းတွေထဲကမှ မြန်မာနိုင်ငံက လူတွေ အားပေးမှုအများဆုံးဖြစ်တဲ့ ဘောလုံးအားကစားနည်းက ပိုပြီးတော့မှ ထိရောက်နိုင်တဲ့ အားကစားနည်းဖြစ်ပါတယ်။

ဘောလုံးအားကစားနည်းနဲ့ စုစည်းညီညွတ်မှုကို ရယူနိုင်ရေးဆိုတာက  

မြန်မာတစ်နိုင်ငံလုံးကိုကိုယ် စားပြုထားတဲ့ လက်ရွေးစင်အသင်းဟာ မတူကွဲပြားမှုပေါင်းစုံနေတဲ့ မြန်မာနိုင်ငံကို ဘယ်လောက်ထိ ပုံဖေါ်နိုင်သလဲ၊ ဘယ်လောက်ထိ အရောင်အသွေးစုံကို ကိုယ်စားပြုနေသလဲ ဆိုတာတွေက အရေးကြီးပါတယ်။ အဲ့ဒါအပြင် အရာရာမှာ 

နောက်ကျကျန်နေခဲ့တဲ့ နိုင်ငံတစ်ခုက ပြည်သူတွေအနေနဲ့ အနိုင်ရခြင်းဆိုတဲ့ ခံစားမှုကို                     လိုချင်ကြမှာ အမှန်ပါပဲ။ အဲ့ဒီပြည်သူတွေရဲ့ မျှော်လင့်ချက်ကို နိုင်ငံ့ခေါင်းဆောင်တွေက 

ဖြည့်ဆည်းပေးဖို့ တာဝန်ရှိပါတယ်။

အားကစားနဲ့ တစ်နိုင်ငံလုံး စုစည်းညီညွတ်ရေးနဲ့ပတ်သက်ပြီး တောင်အာဖရိကနိုင်ငံရဲ့ သမ္မတနယ်ဆင်မင်ဒဲလား လုပ်ဆောင်ခဲ့တာကို ပြန်လည်ရိုက်ကူးထားတဲ့ Invictus ဆိုတဲ့ ရုပ်ရှင်ဇာတ်ကားထဲ အကြောင်းအရာကို ဆောင်းပါးမှာ ထည့်သွင်းဆွေးနွေးလိုပါတယ်။ ဒီဇာတ်ကားကတော့ တောင်အာဖရိကနိုင်ငံရဲ့ နိုင်ငံရေးခေါင်းဆောင် နယ်ဆင်မင်ဒဲလား 

သမ္မတတာဝန် စတင်ထမ်းဆောင်လာတဲ့ အခြေအနေကို ရိုက်ကူးထားတဲ့ ဇာတ်ကားပါ။ 

နယ်ဆင်မင်ဒဲလားဟာ ထောင်ထဲမှာ ၂၇ နှစ်လောက် အချုပ်အနှောင်ခံခဲ့ရပြီးတဲ့နောက် 

၁၉၉၀ ခုနှစ်မှာ လွတ်မြောက်လာခဲ့ပါတယ်။ သူလွတ်မြောက်ပြီး ၄ နှစ်အကြာမှာပဲ သူဟာ တောင်အာဖရိကနိုင်ငံရဲ့ ပထမဆုံး လူမည်းသမ္မတ ဖြစ်လာခဲ့ပါတယ်။ နယ်ဆင်မင်ဒဲလား သမ္မတ တာဝန်ထမ်းဆောင်တဲ့ အချိန်ဟာ လူမျိုးရေး ပဋိပက္ခတွေ နိုင်ငံရေးပြဿနာတွေ ရှုပ်ထွေးနေတဲ့ အပြောင်းအလဲကာလတစ်ခုပါ။ အပြန်အလှန်ယုံကြည်မှုတွေ ပျောက်ဆုံးပြီး တစ်ဖက်နဲ့တစ်ဖက် စိုးရိမ်စိတ်တွေ သံသယတွေ ရှိနေတဲ့ လူ့အဖွဲ့အစည်းအတွင်းမှာ စုစည်းညီညွတ်ရေး 

လုပ်ဆောင်ဖို့ဆိုတာ မလွယ်ကူပါဘူး။ သမ္မတ နယ်ဆင်မင်ဒဲလားက တောင်အာဖရိက နိုင်ငံက နိုင်ငံသားအားလုံး လူဖြူ လူမည်း မခွဲ တသားတည်းဖြစ်ရေးဆိုတဲ့ ရည်မှန်းချက်ကို အကောင်ထည်ဖေါ်တာမှာ ရပ်ဘီဘောလုံးအားကစားနည်းကိုလည်း အသုံးပြုခဲ့ပါတယ်။

ရပ်ဘီအားကစားနည်းဆိုတာက တောင်အာဖရိကနိုင်ငံမှာ အပေါ်ယံလွှာက လူဖြူ 

လူတန်းစားတွေ အများဆုံး ကစားကြတဲ့ ကစားနည်းပါ။ ဒါ့ကြောင့် တောင်အာဖရိကနိုင်ငံ နိုင်ငံ့လက်ရွေးစင်ရပ်ဘီဘောလုံးအသင်းက လူဖြူတွေချည်းလိုလို ပါဝင်နေတဲ့ အသင်းဖြစ်နေပါတယ်။ ၁၉၉၅ ခုနှစ် ရပ်ဘီကမ္ဘာ့ဖလားပြိုင်ပွဲကို တောင်အာဖရိကနိုင်ငံ အိမ်ရှင်အဖြစ်လက်ခံကျင်းပခွင့်ရခဲ့ပါတယ်။ အဲ့ဒီမှာပဲ သမ္မတ နယ်ဆင်မင်ဒဲလားဟာ ရပ်ဘီဘောလုံးအသင်းကို အခြေခံပြီး 

လူဖြူ လူမည်းကြားက ကွဲပြားခြားနားမှုပျောက်ပြီး စုစည်းညီညွတ်မှုရအောင် ကြိုးပမ်းလာပါတယ်။

လူဖြူတွေပါနေတဲ့ တောင်အာဖရိက ရပ်ဘီလက်ရွေးစင်အသင်းကို တောင်အာဖရိကနိုင်ငံသားလူမည်းတွေက အားမပေးကြပါဘူး။ သူတို့နဲ့ ဘာမှမသက်ဆိုင်တဲ့ ဘောလုံးအသင်းတစ်သင်းအဖြစ်သဘောထားရုံသာမကဘဲ အင်္ဂလန်နဲ့ တောင်အာဖရိက ကစားခဲ့တဲ့ ပွဲစဉ်မှာ အင်္ဂလန်ဘက်ကနေ အားပေးခဲ့ကြပါတယ်။ 

ဒီအခြေအနေကို သမ္မတနယ်ဆင်မင်ဒဲလားက ပြောင်းလဲဖို့ကြိုးစားခဲ့ပါတယ်။ 

သူ့ကို သဘောမကျတဲ့ ရပ်ဘီအသင်းခေါင်းဆောင်ကို ခေါ်တွေ့တယ်၊ရပ်ဘီလက်ရွေးစင်အသင်းကို အခြေခံလူတန်းစားရပ်ကွက်တွေထဲကို လူမည်းကလေးငယ်တွေနဲ့ ထိတွေ့စေပြီး ရပ်ဘီအားကစားကို စိတ်ဝင်စားလာအောင် အတူတကွကစားစေတယ်။ ရပ်ဘီလက်ရွေးစင်အသင်းကို သူအကျဉ်းကျခဲ့တဲ့ Robben Island က အကျဉ်းထောင်ကို သွားရောက်လည်ပတ်စေတယ်။ သူကိုယ်တိုင်လည်း တောင်အာဖရိကလက်ရွေးစင် ရပ်ဘီဘောလုံးအသင်းကို နှစ်နှစ်ခြိုက်ခြိုက်အားပေး။ အရာရာမှာ ရှုံးနိမ့်နေရတဲ့ သူ့ပြည်သူတွေကို အောင်မြင်မှုအရသာခံစားစေချင်တယ်။ လူဖြူ လူမည်းမခွဲဘဲ နိုင်ငံချစ်စိတ်တွေ တူညီလာစေချင်တယ်ဆိုတဲ့ ဆန္ဒတွေကို အခြေခံခဲ့တယ်။ နောက်ဆုံး ဗိုလ်လုပွဲမှာ တောင်အာဖရိကနိုင်ငံက နယူးဇီလန်းကို အနိုင်ယူပြီး ကမ္ဘာ့ဖလားမှာ ချန်ပီယံဖြစ်ခဲ့တယ်။ အဲ့ဒီပွဲစဉ်ကို တောင်အာဖရိကနိုင်ငံက တစ်နိုင်ငံလုံး လူဖြူလူမည်းမခွဲဘဲ အားပေးခဲ့ကြသလို တစ်နိုင်ငံလုံးရဲ့ အောင်မြင်မှုအဖြစ် အောင်ပွဲခံခဲ့ကြတယ်။

ဒီဇာတ်လမ်းကို သာမန်အားဖြင့်ကြည့်မယ်ဆိုရင်တော့ နာမည်ကြီး နိုင်ငံရေးခေါင်းဆောင် သမ္မတ တစ်ယောက်က နိုင်ငံရဲ့ ရပ်ဘီဘောလုံးအသင်းကို အားပေးတာပါပဲ။ ဒါပေမယ့် အဲ့ဒီနောက်ကွယ်မှာ ရှိနေတဲ့ ရည်ရွယ်ချက်နဲ့ စိတ်စေတနာတွေဟာ သတိပြုစရာ စံပြုစရာပါ။ စကားလုံးတွေအားဖြင့် ကြီးကျယ်ခမ်းနားပြီး ခက်ခဲမယ်ထင်ရတဲ့ နိုင်ငံတည်ဆောက်ရေး(State Building) အမျိုးသားတည်ဆောက်ရေး(Nation Building ) ဆိုတာတွေကို ဖေါ်ဆောင်တဲ့အခါမှာ တချို့နည်းလမ်းတွေက သေးငယ်ကောင်းသေးငယ်နေမယ် ရိုးရှင်းကောင်းရိုးရှင်းနေမယ်။ ဒါပေမယ့် တစ်ခါတစ်ရံမှာတော့ အရေးမကြီးလောက်ဘူးထင်တဲ့ နည်းလမ်းတွေက လူတွေရဲ့ နှလုံးသားကို သိမ်းပိုက်နိုင်တတ်တာမျိုးကို သတိပြုစရာကောင်းပါတယ်။ 

ဒီနေရာမှာ စိတ်ကူးမျှော်မှန်းကြည့်တာကတော့ နိုင်ငံအတွင်းမှာ ရှိနေတဲ့ လူမျိုးရေး ဘာသာရေးအစွဲတွေ နိုင်ငံရေးအယူအဆအစွဲတွေကို ကျော်လွန်ပြီး အားလုံးတူညီတဲ့ ခံစားမှုတွေကို ရရှိစေနိုင်ဖို့အတွက် မြန်မာ့လက်ရွေးစင်ဘောလုံးအသင်းကနေစတင်ကြည့်ရင် ဖြစ်နိုင်မလားဆိုတာပါ။ မတူကွဲပြားတွေနဲ့အတူရှိနေတဲ့ စုစည်းညီညွတ်မှု(Diversity within unity) ဆိုတာကို မြန်မာဘောလုံးအသင်းမှာ ပုံဖေါ်ပြပြီး တစ်နိုင်ငံလုံးရဲ့ညီညွတ်မှုကို ရှာဖွေမယ်ဆိုရင် ဖြစ်နိုင်မလားဆိုတာ စိတ်ကူးမျှော်မှန်းမိပါတယ်။ ဒီလိုဖြစ်ဖို့ဆိုရင်တော့ မြန်မာ့လက်ရွေးစင် ဘောလုံးအသင်းဟာ အခုထက်ပိုပြီး အရောင်အသွေးစုံဖို့ လိုအပ်တာတော့ အမှန်ပါပဲ။အရောင်အသွေးစုံတဲ့ လက်ရွေးစင်ဘောလုံးအသင်းတစ်သင်းကို တည်ဆောက်တဲ့နေရာမှာလည်း အောင်မြင်မှုတွေကိုတက်လှမ်းနိုင်မယ့် အရည်အသွေးပိုင်းဆိုင်ရာ မြှင့်တင်မှုတွေ ဖြည့်ဆည်းမှုတွေကိုပါ တပါတည်းလုပ်ဆောင်ဖို့လိုအပ်ပါတယ်။ 

ထင်ထားသလောက် အောင်မြင်မှုမရတဲ့ နေရှင်နယ်လိဂ်တစ်ခုတည်းကို အမှီပြုမထားဘဲ 

တချိန်က ဒေသချစ်စိတ်နဲ့ အားပေးမှုများခဲ့တဲ့ ကျောင်းသားအဆင့်ကစလို့ အဆင့်ဆင့် တိုင်းနှင့်ပြည်နယ်ပွဲတွေကိုလည်း စိတ်ဝင်စားအသက်ဝင်လာအောင် ဖန်တီးပေးဖို့လိုအပ်ပါတယ်။ ကစားသမားရွေးချယ်မှုတွေမှာလည်း လူမျိုး ဘာသာ၊ နေရာဒေသ ခွဲခြားမှု ဘက်လိုက်မှုတွေကို အခြေမခံဘဲ ရွေးချယ်ပြဖို့ လိုအပ်ပါတယ်။ လက်ရွေးစင်အသင်းမှာ ဘာလူမျိုး၊ ဘယ်ဘာသာ မပါသင့်ဘူးဆိုတဲ့ စဉ်းစားချက်မျိုး မထားဘဲ နိုင်ငံသားအခြေခံတန်ဖိုးနဲ့ ရွေးချယ်မှသာ နိုင်ငံသားအားလုံးရဲ့ကိုယ်စားပြုမှုကို ရရှိစေမှာဖြစ်ပါတယ်။

မြန်မာနိုင်ငံရဲ့ အမျိုးသားရင်ကြားစေ့ရေးဆိုလိုက်တဲ့အခါ တပ်မတော်နဲ့ အာဏာရဒီမိုကရေစီအင်အားစုတွေကြားက ရင်ကြားစေ့ရေးနဲ့ အခမ်းအနားပွဲတွေထဲက ငြိမ်းချမ်းရေးမှတင်ရပ်တန့်နေဖို့ မသင့်ဘဲ လူ့အဖွဲ့အစည်းတစ်ခုလုံးကို အကျိုးသက်ရောက်မှုရှိစေမယ့် တခြားသောနည်းလမ်းတွေနဲ့ ဆန်းသစ်တီထွင်မှုရှိနိုင်မယ့် နည်းလမ်းတွေကို ရှာဖွေလုပ်ဆောင်ဖို့ လိုအပ်ပါတယ်။ အဲ့ဒီ လိုအပ်ချက်တွေမှာ အားကစားနည်းတွေက နိုင်ငံတည်ဆောက်ရေး အမျိုးသားတည်ဆောက်ရေးအတွက် အခန်းကဏ္ဍတစ်ခုအနေနဲ့ ဖန်တီးဖေါ်ဆောင်ဖို့က သိမ်မွေ့တဲ့ နည်းလမ်းကောင်းတစ်ခုဆိုတာ နိုင်ငံ့ခေါင်းဆောင်တွေ သတိပြုမိစေလိုပါတယ်။