ယိမ်း ( ကောက်ကွေ့)

by The Loner (Notes) on Friday, May 31, 2013 at 12:12am

              

               ကျွန်မလေ မောင့်ကို တကယ်ချစ်မိနေပြီလား မသိဘူး။မောင်နဲ့စတွေ့တုန်းက အမြင်ကတ်တယ်။ သိလား။ ဆရာကြီးလုပ်တတ်တဲ့ မောင် က စကားပြောရင်လည်း အထက်စီးဆန်တယ်။ အန္တရာယ်ဆိုတာ မထင်ထားတဲ့နေရာကလာတာတဲ့။ မောင် က ကျွန်မ အတွက် အန္တရာယ် မဟုတ်ဘူး မဟုတ်လား မောင်။ ကျွန်မ မောင့်ကို တကယ်မချစ်ဘူး။ စိတ်လှုပ်ရှားလို့ အဖြေပေးမိတာ။ မောင်က ပိုသိမှာပေါ့။ စိတ်လှုပ်ရှားတယ်ဆိုတာ ဘာလဲလို့။ ကျွန်မ ရဲ့ ပထမဆုံးအတွေ့အကြုံ ကို“ မောင် “လို့ နာမည်ပေးထားတယ်။ကျွန်မ နဲ့ မောင် ဘုရားသွားတုန်းက ကျွန်မ ဖိနပ် မောင့်ကို ကိုင်ခိုင်းခဲ့တယ်နော်။ မောင် မကိုင်ပေးပါဘူး။ ကျွန်မ ထင်တာနဲ့ တခြားစီပါ မောင်။ ကျွန်မ ဆုံးဖြတ်ချက် ရူးရူးမိုက်မိုက်ဟာ စာကလေးတွေရဲ့ အသံနဲ့ ဖုံးအုပ်လို့။ ကမ္ဘာကြီး ဟာလှောင်အိမ်ပဲ မောင်။
ကျွန်မတို့တွေ့ခဲ့ကြတယ်။ ကျွန်မ တို့ မချစ်သလိုလိုနဲ့ တစ်ယောက်ကိုတစ်ယောက် ဖလှယ်ခဲ့ကြ။ ကျွန်မ ကို တစ်ခါ တစ်ခါ မောင် စကားပြောတာ တစ်မျိုးပဲ။ မောင်နဲ့တွဲရင် ပျော်ရမယ်ထင်လို့။ ကျွန်မကို ကြည့်ပါ မောင်။ အရည်ပျော်နေတဲ့ ကျွန်မမျက်လုံးတွေထဲမှာ အိနြေ္ဒအကျိုးအပဲ့တွေ ၀ိုင်းစက်လို့။ လက်ဖ၀ါးနှစ်ခုကြား ချွေးစက်တွေမှာ ဆွဲအားတစ်ခုခုရှိနေသလား။ ကျွန်မ ကို ခဏ လွှတ်ပြီး ကျွန်မ မေးတာကို ဖြေပါ မောင်။ ကျွန်မ ကို ချစ်လား ။ မညာပါနဲ့ မောင်ရယ်။ ကျွန်မ ကို မောင်မချစ်ပါဘူး။ ဒါ ကျွန်မ ရဲ့ အတ္တအချွန်အတက်တွေပေါ့။ မောင့် အတ္တလိုတော့ အသွားမှန်သမျှ မထက်ရှတာ သေချာတယ် မောင်။ ကျွန်မ ကို အထိခိုက်ဆုံးပေါ့။ ကျွန်မ အဲဒီလိုလည်း မထင်ရက်ပြန်ပါဘူး မောင်။. မောင့်အတ္တက မောင့်လို ၊ ကျွန်မ အတ္တက ကျွန်မ လို။ ဟုတ်လား မောင်။ အရပ်နိမ့်နိမ့် ကျွန်မ ကို ငဲ့ကြည့်ပါဦး။ လူအုပ်ထဲတိုးဝှေ့နေဖို့ ကိုယ်တိုင်းမှမလိုတာ မောင်။ ကျွန်မ ကလည်း အနောက်တိုင်းယဉ်ကျေးမှု ကို မှ ထိကိုင်ဈေးဆစ်ကြည့်ချင်တယ်။


     မောင် က အထက်တန်းကျောင်းမှာကတည်းက ရည်းစားထားခဲ့ဖူးတယ်ဆို။ ကျွန်မ မေးခွန်းတွေ မောင့်လက်ထဲ ထည့်တာ သိပ်များသွားသလား။ မောင့်အတွက် မထူးဆန်းပေမဲ့ ကျွန်မ က အခုမှ ဓာတ်ခွဲခန်းထဲဝင်ဖူးတဲ့ ပထမနှစ်ကျောင်းသူ။ မထုံတက်တေးပါ။သူနဲ့ ကျွန်မ ဘာကွာသလဲ။ “တင်ဇာ(သဉ္ဇာ)“နဲ့ကျွန်မ။ အခုမှစတွေ့ဖူးတဲ့သူကိုနာမည်တလွဲခေါ်တာ လူမုန်းများဖို့ဖြစ်နိုင်ချေအများဆုံးတဲ့။ ကျွန်မ ကို မမုန်းပါနဲ့။ မောင် သူ့နာမည် ကို ဂါထာတစ်ခုလို ရွတ်ခဲ့မှာပေါ့ မောင့်ဒဏ်ရာ မောင်ကုဖို့။ သိပ်နာသလားမောင်။ ကျွန်မ တော့ မောင့်လိုမဖြစ်ချင်ဘူး။ မောင့်နာမည် ကိုတော့ ကျွန်မ သိပ်ရွတ်ရဲတာပေါ့။ အချစ်ဆိုတာ ဘာလဲမောင်။ ကျွန်မ အသက်အရွယ်ကြောင့် အဲဒါ ကို စမ်းသုံးကြည့်တာ။ ကစားကွင်းတစ်ခုထက် ရှုပ်ထွေးနေတယ် မောင်။ ကလပ်ကမီးရောင်တွေထက် ပိုနက်နဲနေတယ်။ ကျွန်မတို့တွဲကလို့ဖြစ်ပါ့မလား မောင်။ ကျွန်မတို့အချိုးအဆစ်မှာ လွတ်လပ်ခြင်းရဲ့ ကကွက် ဘယ်နှမျိုးပါမလဲ။ ကျွန်မ စပြီး မောင့်ကို သစ္စာမဖောက်ဘူး မောင်။ သူ ဘယ်မှာလဲ …မောင်သိလား။ ဆောရီး မောင် ။ ကျွန်မ က မောင့်ကို နာကျင်စေမှာမဟုတ်ဘူး။ မောင့်ခွက်ထဲက စိတ်မကောင်းစရာ ယဇ်ရည်တွေ ကျွန်မခွက်ထဲကိုထည့်ပါ။ ကျွန်မ သောက်နိုင်ပါသေးတယ် မောင်။


               မောင်နဲ့ ကျွန်မ တွေ့မယ်ဆိုရင် ကျွန်မ က မောင့်ဆီကိုလာရတယ်။ ပြီးတော့ မောင့်သူငယ်ချင်းတွေ ကို တစ်ယောက်စီ လိုက်ကြည့်ပြီး ပြုံးပြ။ ကျွန်မ အနေခက်တယ် မောင်။ ရှိရှိသမျှ ရက်ပ်သီချင်းတွေရဲ့ စာသားသာရွတ်ပစ်လိုက်ချင်တယ်။ ကော်ဖီမကြိုက်တဲ့ ကျွန်မ ကို မောင် မှတ်ထားပေးပါ။ တူးတူးခါးခါး ဖြစ်စေမှာလေ ကျွန်မနှုတ်ခမ်းတွေ ကို ။ စတော်ဘယ်ရီနံ့နဲ့ ပြန်ဆေးကြောရမယ့်အစား ကော်ဖီ ကို ကျွန်မ ငြင်းပါရစေ မောင်။ မောင် ကျွန်မ နှုတ်ခမ်း ကို မနမ်းခဲ့ဘူးနော်။ မောင့်အပြောအရဆို မလိုပါဘူး။ ဟုတ်တယ်မောင်။ စီးကရက်အခိုးအငွေ့တွေမှာ မိန်းမတစ်ယောက်ကို သ၀န်တိုစေနိုင်တဲ့ အာနိသင်တစ်မျိုးပါဝင်သလား။ ဒါမှမဟုတ် ဆေးလိပ်သောက်နေရတာကိုက မောင့်ဝါသနာလား။ မောင့် စီးကရက်ဗူးခွံထဲမှာ ကျွန်မ မနေချင်ဘူး မောင်။ ကျွန်မရဲ့ သတို့သမီး ၀တ်စုံ အဖြစ်နေပါလား မောင်။ ကျွန်မပြန်ရင်လည်း မောင်လိုက်မပို့ဘူးနော်။ ကားပေါ်တော့တင်ပေးပါရဲ့။ အများသုံးကားဆိုတာကို မောင့်လောက်တော့ ဘယ်ရင်းနှီးပါ့မလဲ။ ကျွန်မ က ပလာဇာရောက်ရင် ဖြစ်သလိုပစ်တင်ရတဲ့ အ၀တ်ထုပ်လား မောင်။ ကျွန်မကြောင့် ၀န်လေးနေသလား။ ကျွန်မ မြည်းတွေ ကို မြင်ဖူးသားပဲ။ တာဝန်လို့ ဒါမှမဟုတ် ၀တ္တရားလို့ ကျွန်မ ကို မှားမခေါ်မိစေနဲ့ မောင်။ ကျွန်မ မကြိုက်ဘူး။ အရပ်နိမ့်နိမ့် ကျွန်မ က ဒုက္ခ ကို ပေမမှီ ဒေါက်မမှီပါ မောင်။ ကျွန်မ … မောင်တို့ သင်္ဃန်းကျွန်း ကို “ ဝေ “တို့နဲ့ ခင်မှ ရောက်ဖူးတာပါ။ ရွှံ့ထနေတဲ့ လမ်းတွေ ကို ကျွန်မ ရွံတယ်။ မောင်နဲ့တော့ ဆန့်ကျင်ဘက်ပေါ့။ ၄၉ နဲ့ ကျွန်မ တစ်ခုံတည်းမစီးချင်ဘူး မောင်။ ရန်ကုန်သူတော့ ရန်ကုန်သူပေါ့ မောင်ရယ် ... ကျွန်မ ရန်ကုန်မိုးကို ကြောက်တယ်။ ရှုဆေးတစ်တောင့် ၊ အားနည်းချက်အပြည့် နဲ့ ကျွန်မ ကို မောင်ဘာလို့ ချစ်သလဲ။ ကျွန်မ မောင့်ဆီကို လာတုန်းကအတိုင်း တစ်ယောက်တည်းပြန်ရဦးမှာမဟုတ်လား။ တက္ကစီ သမားတွေကို ကျွန်မ မယုံဘူး။ ကျွန်မ ကြောက်တတ်လာသလိုပဲ မောင်။ အကြောက်တရားတွေ ကို မောင့်လက်ဖ၀ါးတွေနဲ့ကိုင်မြှောက်ပြီး ဝှေ့ရမ်းနှုတ်ဆက်ချင်တယ်။ ကျောင်းမှာတွေ့မယ် … မောင်။


               မောင် ကျွန်မ ကို တကယ်မချစ်ဘူးလို့ ကျွန်မ ထင်တာ မှားသလား။ ကျွန်မ မသိအောင် ထည့်ပေးလိုက်တဲ့ နွေးထွေးမှု “ကားခရောပါရဲ့လား“ဆိုတာလေ။ မေးစရာရှားလို့ မောင်ရယ်။ တစ်နေ့လုပ်မှတစ်နေ့စားရတဲ့ လူတွေ ကို ကျွန်မ ခင်ပါတယ်။ ဒါ မောင်ပြောသင့်တဲ့စကားမဟုတ်ဘူးနော်။ ကျွန်မ ဂီတ နဲ့ မောင့် ဂီတ တစ်ထပ်တည်းကျစရာမလိုပါဘူး။ သူ့ ကို မောင်အရမ်းချစ်ခဲ့သတဲ့။ မောင့် ဒရမ်မာတစ်ပုဒ် ကို “ ရွှေ “ က ကျွန်မ ကို ပြောပြတယ်။ သူ့ကို ကျွန်မ လို မဆက်ဆံဘူးမဟုတ်လား။ ပြီးတော့ ကျွန်မ က သူမဟုတ်ဘူးမောင်။ မောင်နဲ့ကျွန်မ ခေါက်ချိုးညီစရာမလိုသလို ပလက်ဖောင်း အလည် က သစ်ပင်တန်းတွေလို တိတိရိရိ ။ ကျွန်မ ကို ပုံလောင်းစရာမလိုဘူးမောင်။ အဲ့ဒီလို မလုပ်တဲ့အတွက်တော့ မောင့် ကို ကျွန်မ ကျေးဇူးတင်တယ်။ မလိုတဲ့ စကားတွေပြောမိပြန်ပြီမောင်။

              မောင်နဲ့ ကျွန်မ ပထမဦးဆုံး ရန်ဖြစ်ဖူးတယ်။ မှတ်မှတ်ရရ ပဲ ကျွန်မတို့ လမ်းခွဲခဲ့ကြတယ်။ ကျွန်မတို့ဘာလို့ရန်ဖြစ်တယ်ဆိုတဲ့အကြောင်း။ မောင်သိလား။ ကျွန်မ မှစိတ်မကောက်ရင် မာနဆိုတာ အသံထွက်မှန်လောက်တော့မယ် မထင်ဘူး ။ နားလည်ဖို့ ပြောတာ မောင်နော်။ နားမလည်တာလည်း မောင်ပဲ။ ကျွန်မ လက်သည်းတွေ မောင့်အရောင်ဆိုးပြီး မိန်းမဆန်ဆန် ယတြာချေတယ်။ မျက်ရည်ဆိုတာ အိပ်ဇောပိုက်ကထွက်တဲ့ မီးခိုးပဲ မောင်။ သေချာတာ အဲ့ဒီနေ့က ကျွန်မ ဘာမှမမြင်တာပဲ။ လုံလောက်တဲ့ အလင်းရောင်နဲ့ ညနေခင်းလည်းရှိပါရဲ့။ ကျောင်းပိတ်ရက်တွေ ထူပြစ်လာတယ်။ ကျွန်မ မောင့်ကို တွေ့ချင်တယ်။ မနက်အစောကြီး ခေါင်းလျှော်လို့ အဆူခံရသေးတယ်။ ကျွန်မမှာ ပါလာသမျှ သိက္ခဟာ မောင့်ဆီရောက်ခါနီးမှ လဲလိုက်ရတဲ့ ကားတာယာပဲမောင်။ တက္ကစီဦးလေးကြီး က ကျွန်မ ကို ခဏခဏကြည့်တယ်။ သူ ကျွန်မ ကို အားနာနေတာထက်ပိုနေတယ် မောင်။ ကိစ္စမရှိပါဘူးမောင်။ ကျွန်မ မောင့်အတွက် သည်းခံရမယ်။ မောင် ကျွန်မ ကို နှင်းတွေမိုးပြီး လိုက်ပို့မှာ။ ကျွန်မ ပို့စ်ကဒ်ကို မောင် က အက်ကွဲစေခဲ့တာ။ ကျွန်မ အတွက်လား မောင့်စက်ဘီးကယ်ရီခုံနောက်က ပေါက်ကွဲဖို့တာစူနေတဲ့ မတန်တဆ Weedတွေ။ကျွန်မ ကို ရင်ဖွင့်ပါမောင်။ သူတို့ကိုလွှင်ပစ်ပါ။ဟုတ်တယ်။ကျွန်မ က တော့ ရင်ဖွင့်ခဲ့တယ်။“ကျွန်မဆီမလာနဲ့တော့“။ ကျွန်မ ကို ပြန်ခွင့်ပြုပါဦး မောင်။ မောင့်ဘ၀ ကို မီးပြင်းပြင်းမြှိက်ရင်း ကျန်ခဲ့ပေါ့။ အဓိပ္ပာယ်ကောက်လွဲခဲ့တဲ့ မောင် က စက်ဘီး ကို မတ်တပ်ရပ်စီးရင်း ပေါ့ပေါ့းပါးပါး။ ချိန်းကြိုးတွေကြားမှာ ကျွန်မနဲ့ကျွန်မရဲ့  အမြင်အာရုံသာ လေးလေးပင်ပင် ကြေညက်လို့။

              သူငယ်ချင်းတွေကို ကျွန်မ ဘယ်လိုဖြေလိုက်ရမလဲ မောင်။ “ မောင် လိုက်မပို့လို့ “လို့။ အဲဒီလိုလား မောင်။ “ဘာမှမဟုတ်ဘူး“ တွင်တွင်ခါရမ်းနေတဲ့ ကျွန်မ က လွန်သတဲ့။ ကျွန်မ က မောင့်မျက်လုံးတွေရဲ့ အနီရောင်ထောင့်စွန်း။ ကျွန်မ ဖိနပ်ကိုင်ပေးခဲ့တဲ့မောင့်ကို သူတို့က တောင်းပန်လိုက်ပါတဲ့။ ကျွန်မလွယ်ထားတဲ့ အရှက်တရား ၊ ကျွန်မ မလွယ်ထားတဲ့ သဲကိုးဖြာတွေ ပစ်ချ။ မောင့် ကို ကျွန်မ တောင်းပန်ခဲ့တယ်နော်။ မောင့်ကို ကျွန်မ ဆွဲလားရမ်းလားကိုတောင်းပန်ခဲ့တယ်။ သူတို့ပယောဂမပါဘဲ ။ မောင့်အတွက် ကျွန်မ က အရှက်တရား မလုံ့တလုံလေးပါ မောင်။ အအေးသောက်တဲ့ပိုက်လေးပါ။ ကန်တင်းကြီးတစ်ခုလုံး မြုပ်သွားအောင် နှစ်ပစ်ခဲ့တဲ့ကျွန်မ ပါ မောင် ။ ကျွန်မ မလွန်ဘူးမောင်။ အဆုံးသတ်စာတန်းတစ်ကြောင်း ကို တဖြည်းဖြည်း တိုးဝင်ပျောက်ကွယ်ရင်း တစ်ယောက်တစ်ကွဲစီ ထိုးခဲ့ကြ။ မျက်ရည်ဆိုတာ အကောင်းဆုံးလက်နက် မဟုတ်မှန်း။ ကျွန်မသိလိုက်တယ်။

              အချိန်ကာလတစ်ခုအတွက် မောင့် ကို ကျွန်မ နာမည်ပေးခဲ့ပြန်တယ်။ ရူးသွပ်ခြင်း ကို “ မောင် “လို့။ ကျွန်မ လက်ဖ၀ါးတစ်ဖက်မှာ မောင့်လက်ဗွေရာတွေ အပြည့်နဲ့။ ဒါ သူ မောင့်ကိုပေးခဲ့တဲ့ သူလက်ဗွေရာတွေလားမောင်။ အချစ်တွေ သံယောဇဉ်တွေ ကျွန်မမသိဘူး မောင်။ ဖွင့်ဆိုချက်တွေ ကို Greenday – Kill The DJ (ကျွန်မနဲ့တွေ့ရင် မောင်ဖွင့်နေကျ) သီချင်းလို မုန်းတယ်။ မောင့် ကျောင်းနဲ့ ကျွန်မ ကျောင်း ၊ မြို့တွင်းနဲ့မြို့ပြင်။ မောင့်ကို ကျွန်မ မျှော်မနေခဲ့ဘူး။ ယုံလိုက်မောင်။ အက်ဆစ်ဟာအက်ဆစ်ပဲ။ အပြင်း တွေ အပျော့ တွေ ကို အရေပြားတွေ ခံစားလိမ့်မယ်။ အခု ကျွန်မ အမေးဝါကျတွေကို ကျွန်မ လို ချစ်တယ်။ မောင့်လိုမဟုတ်ဘူးနော်။

             ဟိုမျက်မှန်နဲ့ကောင်မလေး ကို လိုက်တဲ့ တစ်ယောက်လေ။ ကျွန်မ ကို စာလာပေးတယ်။ ပန်းနုရောင် ချွဲသံ နဲ့ ပိတ်ထားတဲ့ စာတစ်အိတ်ပါ မောင်ရယ်။ ဟိုကောင်တွေတားတာ မရဘူးတဲ့။ ကျွန်မတို့အကြောင်း သူသိရက်သားနဲ့။ မောင် သာ ကျွန်မ အနားမှာရှိနေရင် သူပေးမှာမဟုတ်ဘူး။ ပေးရဲမှာ မဟုတ်ဘူးမောင်။ ဟုတ်သားပဲ သူ ၊ ကျွန်မတို့အကြောင်း ကို သိနေတာပဲ။ ကဗျာတစ်ပုဒ်အတွက် မောင် ဘယ်ဘောက် ထိခိုက်ရှနာခဲ့ဖူးလဲ။ မောင် ပြောနေကျ ခံစားမှုဝါဒီတစ်ယောက် ကို ကျွန်မ မမြင်ဖူးပေမဲ့ ကျွန်မ လေ မောင့် ပင်ပန်းမှုတွေ ခပ်သော့သော့ရေးထားတဲ့ ကဗျာတစ်ပုဒ် ကို အရသာခံဖတ်မိခဲ့တယ်။ ပြီးတော့ မောင့်ကိုပါ တစ်ဆက်တည်း။ ထားလိုက်ပါ မောင်။ ကျွန်မ ကို ထားလိုက်ပါ။ ကျွန်မ ဆံပင်နဲ့ စကတ်ကို တိုပစ်လိုက်တယ်။ ကိုယ့်ကိုယ်ကို အဆုံးစီရင်ခြင်း မဟုတ်ဘူးမောင်။ မောင် အခုဘာလုပ်နေလဲ။“ ဝေ “ ကျွန်မဆီကို မောင့်ကိုယ်ပွား သယ်လာတယ်။ အက္ခရာတွေ ထိုးထိုးထောင်ထောင် နဲ့ မောင့်လက်ရေး။ ကျွန်မ ကို တောင်းပန်စရာမလိုပါဘူးမောင်။ မောင် စာမေးပွဲကျတာ ကျွန်မကြောင့်။ ဟုတ်လား။ မောင့်အချိန်တွေ ကို မောက်စ်တွေ က လှိုက်စားခဲ့တာမဟုတ်လား။ Dota  က ကျွန်မလောက်မှ မလှတာမောင်ရယ်။ အဝေးကလာနေတဲ့ ကျွန်မ ကို မောင် မှုန်ဝါးဝါးမြင်စေတာသူ့ကြောင့်။ ကျွန်မ မှာ သန္တာရောင်နှုတ်ခမ်းတစ်စုံရှိတယ်။ သူ့ကိုလျှော့ပါ။ ကျွန်မ ကိုတိုးပါ။ ဒီနေ့ဆိုတဲ့ ရက်စွဲလေး ကျွန်မ ပုံမပျက်သိမ်းထားလိုက်မယ်။ ကျွန်မ ဗိုက်ဆာပြီ မောင် ။ ကန်တင်းသွားရအောင်။

              မောင် က အခုလည်း ဒီအတိုင်း ၊ အရင်ကလည်း ဒီအတိုင်း။ ကျွန်မ ကျောင်းကို လာတာ ကျွန်မ ဆီကိုပေါ့။ ဟုတ်လားမောင်။ မောင့်မျက်လုံးတွေ ကို ကျွန်မ လက်ထိပ်မခတ်ရက်ဘူး။ ခေါင်းစဉ်ကွဲတွေကို ကျွန်မ မယုံဘူး။ မောင့်ထက် ကျွန်မ အလှကြိုက်တာ မောင်သိပါတယ်။ ဒါပေမဲ့ ကျွန်မ ကို မောင့် အထူးပြုဘာသာရပ်အဖြစ် ဒီတစ်ခေါက် သတ်မှတ်ပေးပါ။ အဆောင်ရှေ့ က ဖြတ်လျှောက်သွားတဲ့ ခပ်ကိုင်းကိုင်းလွယ်အိတ်လေး မောင့်ကို ကျွန်မရော ချိုပါ မြင်တယ်။ ကျွန်မ ကို မမြင်တဲ့ မောင့် ကို ချိုက လှမ်းမခေါ်ဘူးလားတဲ့။ မောင် က ကျွန်မ ကို ကြားမတဲ့လား။ ကျွန်မ ချို့ချို့တဲ့တဲ့ပြုံးလိုက်မိသလားမသိဘူး မောင်။ ကျွန်မဆီမောင်လာတာမှမဟုတ်တာ။ မောင်နဲ့ ကျွန်မ က ဘာတွေလဲ။ ဧည့်သည်တွေလို့တော့ မဖြေနဲ့ မောင်။ မောင်နဲ့ လျှောက်လည်ချင်နေတဲ့ နေရာတွေမှအများကြီး။ စိတ်ကောက်နေတဲ့ ကျွန်မ ကို ချော့စေချင်တယ်။ မောင်နဲ့ကျွန်မကြားကလေထုမှ တတိယကမ္ဘာစစ်ရဲ့ အငွေ့အသက်တွေ။ ကျွန်မတို့မတွေ့ဖြစ်တဲ့ စာသင်နှစ်တစ်နှစ်အတွင်း ကျွန်မပြောင်းလဲသွားခဲ့ပြီ။ ကျွန်မ လက်ကိုတွဲ ၊ ကျောင်းပတ်လမ်းမှာ ကျွန်မ ကို သုံးသပ်ပါဦး မောင်။ ကျွန်မ မလိမ်တတ်ပေမဲ့ မပွင့်လင်းတော့ဘူး။မောင့်စကားတစ်ခွန်းကြောင့် မျက်လုံးကြောင်ကြောင် နဲ့ တစ်ညလုံးမှောင်ခဲ့ဖူးတယ်။ “မောင် ကလွဲရင် မင်းကို ဘယ်သူမှမချစ်ပါဘူး“ ကို ကျွန်မ သဒ္ဒါနည်းနဲ့ကြည့်မိတယ် မောင်။ မောင် မှားတာပေါ့။ မောင် သိပ်ကိုမှားတယ်။ တကယ်ဆို မောင့်အမှား အတွက် သားကောင်ရလာတဲ့ မုဆိုးလက်သင်လေးတစ်ယောက်လို ကျွန်မပျော်နေရမှာ။ ကျွန်မ ကိုယ် ကျွန်မ မင်နီအတားခံလိုက်ရတာကို သွားတွေ့တယ် မောင်။ မောင့်ကြောင့်သာ အခြားသူတွေကို ကျွန်မမမြင်ခဲ့မိတာ။ ကျွန်မ ကို မောင့်ထက် သူတို့ပိုဂရုစိုက်ကြတယ်။ ဒါပေမဲ့ ကျွန်မ ကို သံသယတွေ မျက်စိမှိတ်ပြတာကို မကြိုက်ဘူး။

              အရှည်မြန်တဲ့ ကျွန်မ ဆံပင်တွေ ကို ကျွန်မ မုန်းလာတယ်။ ကျွန်မ ကို လိုက်ပို့မယ့်သူ ၊ လျှောက်လည်မယ့်သူ ၊ ဖုန်းဆက်မယ့်သူ တွေ ရှိနေပြီ မောင်။ ကျွန်မ ပြောခဲ့တဲ့ အခြားသူတွေ ဟာ အခုအချိန်မှာ အခြားသူတွေ မဟုတ်တော့ဘူး။သူတို့က ကျွန်မ ကို မေးတယ်။ ကျွန်မ ပြန်ရင် လိုက်ပို့မယ်သူရှိလားတဲ့။ ကျွန်မအတွက် ကားတွေ ပိုက်ဆံတွေ မလိုဘူး။ လိုက်ပို့မယ့်သူပဲ မောင် ၊ ကျွန်မ လိုတာ။ မောင့်ကိုပဲလိုတာ။ ဒီလိုဖြေလိုက်တယ် မောင်။ “အရင်ကလည်းမရှိဘူး ၊ အခုလည်းမရှိဘူး“။ ကျွန်မ ဖြေတာမှားရင်မှားတယ်ပြော မောင်။မောင့်နေရာကို အစားထိုးသလိုဖြစ်သွားသလား။ ကျွန်မ အစားထိုးခံရတဲ့ အင်္ဂါတွေ ကို မုန်းတယ်။ မောင် က မောင်နဲ့ သိတဲ့လူတွေ ကျွန်မနဲ့တွဲမြင်မှာကို ကြောက်တယ်။ သူတို့ကျတော့ ကျွန်မ ကို သူတို့မိဘတွေနဲ့ တွေ့စေချင်တယ်တဲ့။ မောင် က အရမ်းကြီးတော့ မဆိုးပါဘူး။ မောင့်အမေ ကိုတော့ မောင်ချစ်သားပဲ။ မောင် စာသေချာလုပ်ပါနော်။ မောင့်အတိတ်တွေ ကျွန်မရှေ့ဖြန့်ခင်းပြတဲ့အခါ ကျွန်မ မှာ ပျော်ရမလို ၊ မပျော်ရမလို။ အဲ့ဒီအချိန်မှာ မောင် ဟာ မောင်နဲ့မတူတော့ဘူးဆိုတာ မောင်သိလား။ ကျွန်မ အမောတွေ ကို ကျွန်မ ပါးစပ်ဖျားမှာ ဘယ်လိုဖျောက်လဲ မောင့်ကို ပြောပြမယ်။ ကျွန်မ နဲ့ အခြားသူတွေအကြောင်း မောင့်ကို ဘာမှမပြောင်းဘဲ ပြောတော့ မောင် ကျွန်မ ကို စိတ်တိုတယ်နော်။ ဟုတ်တယ် မောင် ကျွန်မ က မောင့်ကိုပဲ လိုချင်တာ။ ပြီးတော့ မောင့် ကို မသိစေချင်ခဲ့ဘူး။ ဒါ ကျွန်မ ရဲ့ ဒုတိယ ပို့စ်ကဒ်ပေ့ါ မောင်။

              နှင်းတွေ အရမ်းရွာနေတယ်မောင်။ ကျွန်မ စာရေးတာကို ခဏနေရင်ရပ်ရတော့မယ်။ နှင်းတွေအရမ်းရွာနေခဲ့တယ်မောင်။ မောင့် စီးကရက်နံ့တွေ က ကျွန်မ ကို စွန်းပေလို့။ မောင် ကျွန်မ ကို ရှက်ခွင့်လေးတော့ပြုသင့်ပါတယ်။ မောင်မေးခဲ့တဲ့ မေးခွန်း ကျွန်မ မောင့်ကို ပြန်မေးခဲ့တယ်နော်။ “ချစ်သူတွေဘာလို့လက်ထပ်ကြလဲ“။ ကျွန်မ အဖြေ “အချိန်အကြာကြီး အတူတူနေချင်လို့“ ကို မောင် မှတ်မိစရာမလိုဘူးနော်။ ကျွန်မ အခု အချိန်ရတိုင်း စာဖတ်တယ်။  အကယ်ရျှ် ဒါဟာ သစ္စာစကားတစ်ခွန်းရဲ့ မြစ်ဖျားဆို မောင့်ကဗျာတွေ ကျွန်မ ဖတ်ရပါတယ် ။ ကျွန်မ ကြိုက်ရပါတယ် ။မောင့်ကိုလည်းတွေ့ရပါတယ်။

              ဒီစာလေးဟာ မောင်ဖတ်ပြီးခဲ့သမျှ မင်တစ်စက်ရဲ့ ခြေရာပါမကျန် ပျောက်ဆုံးကုန်တော့မှာ (အပေါ်ကကျွန်မရေးခဲ့တဲ့ စာတွေကို ပြန်မကြည့်ဘူးတော့လို့ ကျွန်မ တောင်းခဲတဲ့ ကတိတစ်ခု ပေးပါ … မောင်)


 “  မင်း က
ကတိတွေတင်ပြီး ရွက်လွှင်ခဲ့တဲ့
သင်္ဘောတစ်စင်း
မဟုတ်တော့
ငါ့ ခရုလက်ခုပ်မှုတ်လိုက်တိုင်း
သဲသောင်တစ်ကောင်ရဲ့ ပွန်းပဲ့ရာတွေ
ဆားနံ့သင်းတဲ့လွတ်လပ်ခြင်း
ဘယ်ကမ်းကိုမှမကပ်တော့ဘူး
ကျောက်ဆူးတို့ရဲ့ခံနိုင်ရည်
ငါ့ ၀မ်းဗိုက်မှာရစ်ပတ်
ငါ့ ဘ၀ဆိုတော့လည်း
ငါ့ ဥပဒေပေါ့
ချစ်ခြင်းနဲ့ မင်း
ပြီးတော့ မေတ္တာ
လုံလောက်ခဲ့ပါပြီ။ ။
          -ကောက်ကွေ့-“



မောင့်ကဗျာပါမောင် ။ ကျွန်မ စာကိုဒီမှာတင် ရပ်ရတော့မယ်။ ။

                                                                              မောင့်ရဲ့
                                                                             ချစ်သူငယ်ချင်း
                                                                                “ယိမ်း“





             



| ကောက်ကွေ့